Што здасьць Лукашэнка Пуціну? Дыскусія экспэртаў
Пра што могуць дамовіцца ў Сочы Аляксандар Лукашэнка і Ўладзімір Пуцін? Наколькі імаверныя кардынальныя рашэньні наконт паглыбленьня інтэграцыі? Ці магчымае зацьвярджэньне пляну канстытуцыйнай рэформы ў Беларусі? Як адрэагуе на такі плян беларускае грамадзтва і Захад?
Гэтыя пытаньні ў «Праскім акцэнце» абмяркоўваюць палітычныя аглядальнікі Свабоды Юры Дракахруст, Валер Карбалевіч і Сяргей Навумчык і расейскі палітоляг Кірыл Коктыш.
На Ціміразева міліцыянты на матацыклах уехалі ў калючы дрот. Параненая дзяўчына, — відавочца
Здарэньне адбылося каля 17.00 у раёне дома 46 па вуліцы Ціміразева. Відавочца расказвае, што невялікая група ўдзельнікаў маршу вырашыла прайсьці па вуліцы Ціміразева, а ня рухацца з асноўнай калёнай па Кальварыйскай.
«Думалі, што там ачапленьня няма, але па выніку там быў расьцягнуты калючы дрот, стаяў АМАП, — расказвае відавочца. — Людзі падыходзілі да ачапленьня, вярталіся назад. Нічога не адбывалася. Каля дроту было, можа, 10 чалавек. Там, дарэчы, чамусьці стаяла хуткая. І раптам двое міліцыянтаў на матацыклах разганяюцца, набіраюць хуткасьць і прабіваюць калючы дрот».
Відавочца ня можа адказаць на пытаньне, ці бачылі матацыклісты калючы дрот. «Але там стаялі сілавікі і стаяў аўтамабіль, які перавозіць гэты калючы дрот. Для мяне гэта загадка», — кажа відавочца.
«Дрот зачапіў дзяўчыну, яна заблыталася ў ім, бо стаяла побач, — кажа відавочца. — Іншыя людзі разьбегліся. З боку гэты ўчынак міліцыянтаў абсалютна немагчыма патлумачыць».
Дзяўчыне аказала дапамогу хуткая, якая была побач. Відавочца кажа, што кіроўцы матацыклаў былі ў форме «сілавікоў» і матацыклы былі пазначаныя як ГАІ.
Радыё Свабода зьвярнулася да прэс-службы МУС па камэнтар наконт гэтага здарэньня.
Падобнае здарэньне апісваюць крыніцы TUT.by
З бару пасьля маршу забралі фатографаў
Ужо пасьля сканчэньня менскага маршу ў бары «1067» на вуліцы Раманаўская Слабада сілавікі мэтанакіравана затрымалі трох чалавек, сярод якіх былі фатографы Аляксандар Васюковіч і Ўладзь Грыдзін.
Васюковіч сядзеў у бары з двума мужчынамі, сказала Свабодзе іх суседка па століку Жанна. Пасьля таго як мужчыны выйшлі пакурыць і вярнуліся ў бар, зайшлі 6–7 чалавек у балаклавах. Мужчын затрымалі і забралі іх абсталяваньне.
Пазьней Васюковіч скінуў SOS-паведамленьне з тэлефона з пункту на Кальварыйскай, 43. Прэс-сакратар МУС Вольга Чамаданава паведаміла Tut.by, што Васюковіч знаходзіцца ў Фрунзенскім РУУС, па ім распачалі адміністрацыйны працэс.
Сярод затрыманых таксама фатограф Уладзь Грыдзін, якога пазналі наведнікі бара. Грыдзін шмат год быў фотакарэспандэнтам Радыё Свабода, пакуль 29 жніўня ўлады не пазбавілі яго і яшчэ трох нашых журналістаў акрэдытацыі. Апошнім часам супрацоўнічаў з парталам Tut.by.
На «плошчы Перамен» аднавілі мурал з дыджэямі
Калёна спартоўцаў на менскім маршы. Відэа
Некалькі соцень спартоўцаў прайшліся калёнай ад Нямігі да «Менск-Арэны». Яны скандавалі «Народ — чэмпіён», «Мы пераможам». Людзі віталі іх воклічамі «Малайцы».
Падзеі ў Драздах сёньня на відэа
На адным з кадраў відаць, як каля плота выбухае нешта і ляцяць іскры.
Брутальныя затрыманьні ў Менску. Відэа
Дэманстрантаў абстралялі гранатамі побач з домам Ярмошынай
Дэманстрантаў сёньня абстралялі сьвятлашумавымі гранатамі на вуліцы Ціхай, калі яны адыходзілі ад дома Лідзіі Ярмошынай. Пра гэта паведамляе карэспандэнт «Нашай Нівы», які быў сьведкам гэтага эпізоду.
Некалькі тысяч дэманстрантаў падышлі да дому Ярмошынай на вуліцы Ціхай, скандуючы «Баба Ліда, мы на чай!». Яны пакінулі каля агароджы яе палацыка плякаты і сымбалічныя падарункі. Калі яны адыходзілі ад дому Ярмошынай і на Ціхай заставаліся некалькі соцень чалавек, з другога канца вуліцы прыехалі два бусы і зрабілі чатыры стрэлы ў кірунку дэманстрантаў. Тыя сталі адбягаць.
Паказальна, што іншыя жыхары Драздоў адчынілі вароты сваіх двароў, каб дэманстранты маглі схавацца.
МУС: больш за 400 затрыманых у Менску
На 19:00 у Менску затрымалі больш за 400 чалавек, паведаміў тэлеграм-канал МУС.
Разгон і затрыманьні на Пушкінскай у Менску
Яшчэ нейкі час таму людзі хадзілі па праспэкце са сьцягамі.
Пацярпелыя расказваюць, зь якой жорсткасьцю іх затрымлівалі
Некалькі затрыманых падчас маршу выпусьцілі з РАУС Ленінскага раёну. На іх складаюць пратаколы за ўдзел у недазволеным масавым мерапрыемстве, абяцаюць, што сёньня ўсіх выпусьцяць. Іх чакаюць больш як два дзясяткі сваякоў і сяброў.
Адзін з затрыманых і вызваленых Іван расказаў, што ў актавай залі райаддзелу сядзіць, па ягоных падліках, 57 пратэстоўцаў. Больш дзяўчат і жанчын рознага ўзросту, ёсьць 15-гадовая дзяўчына і некалькі пэнсіянэраў.
Тыя, каго затрымалі ў дварах каля Грандзіцкага рынку, расказалі, што яны сталі ў счэпку, да іх з пагрозамі падышлі амапаўцы, распылілі невядомы газ, ад якога было цяжка дыхаць, многіх білі пры затрыманьні нагамі, дручкамі, цягнулі па зямлі. Дзяўчат хапалі за валасы, выдзіралі пасмы.
Міліцыя патлумачыла выкарыстаньне вадамётаў у Берасьці
МУС патлумачыла прычыну выкарыстаньня вадамётаў у Берасьці: «Каля тысячы чалавек вадзілі карагоды, і гэта стала пагрозай бясьпецы дарожнага руху».
Як выглядаў той карагод, можаце бачыць на відэа.
Менск. Калёна дайшла да скрыжаваньня Прытыцкага і Пушкіна. Вялікая частка пратэстоўцаў засталася каля мэмарыялу памяці Тарайкоўскага. Шмат людзей ужо разыходзяцца вялікімі групамі.
У Горадні ў жорсткіх затрыманьнях удзельнічалі жанчыны з АМАПу
Менск. Калёна маршу рухаецца па праспэкце Пушкіна ў бок мэтро «Пушкінская». У ёй дзясяткі тысяч чалавек
У Гомлі затрыманьні пасьля маршу
У Гомлі пасьля «Маршу герояў» пачаліся адзінкавыя затрыманьні. Міліцыя хапала людзей па дварах, на вуліцах Перамогі, Рагачоўскай і каля цырку. Затрымалі байкераў і іх пасажыраў (на фота) — яны езьдзілі па цэнтры гораду зь бел-чырвона-белым сьцягам.
Менск. Закрылі станцыі мэтро «Маладзёжная», «Няміга», «Фрунзенская», «Пушкінская», «Спартыўная».
У Магілёве завяршыўся «Марш герояў»
Прыхільнікі пераменаў прайшлі цэнтральнымі вуліцамі, у тым ліку і ў Задняпроўі. Па пешаходнай Ленінскай прайшла калёна зь некалькіх дзясяткаў чалавек, пераважна маладых. Усяго, паводле праваабаронцаў цэнтру «Вясна», у маршы ўзялі ўдзел да 3 тысяч чалавек.
Затрымалі прынамсі чатырох. Сярод іх Аляксандар Сабалеўскі, журналіст інтэрнэт-выданьня 6tv.by, які вёў стрым з маршу.
Менск. Як выглядае праспэкт Пераможцаў
Калёна людзей, якая вяртаецца да стэлы, у паскораным рэжыме.
Як выглядала тая частка праспэкту Пераможцаў, што за шэрагам сілавікоў.
А на гэтым відэа чуваць хлапкі. «Людзі ў цывільным» разганяюць дэманстрантаў.
Менск. Супраць пратэстоўцаў ужывалі сьвятлашумавыя гранаты?
Супраць дэманстрантаў у раёне Драздоў пачалі ўжываць сьвятлашумавыя гранаты, піша «Эўрарадыё».
«Мы ня можам пацьвердзіць інфармацыю аб выкарыстаньні сьвятлашумавых гранат у Менску. „Эўрарадыё“ размясьціла фэйкавую інфармацыю ў сетцы інтэрнэт пра гэта», — заявіла Свабодзе афіцыйная прадстаўніца МУС Беларусі Вольга Чамаданава.