Суд Маскоўскага раёну Менску 10 верасьня аштрафаваў затрыманых напярэдадні шасьцярых студэнтак БДМУ на 675 рублёў кожную, піша тэлеграм-канал «Рупар БДМУ». Дзяўчаты правялі ноч у ізалятары на Акрэсьціна.
Каго аштрафавалі?
- Анастасію Шматкову;
- Паліну Вежнавец;
- Яну Зябко;
- Тацяну Каплун;
- Марыю Алешка;
- Дар’ю Эркаеву;
- Адрыяну Шарэль.
За што аштрафавалі?
Усіх затрыманых абвінавацілі ва ўдзеле ў несанкцыянаваным масавым мерапрыемстве (ч. 1 арт. 23. 34 КоАП).
Што кажа кіраўніцтва БДМУ?
Раніцай 10 верасьня рэктар унівэрсітэту Анатоль Сікорскі і дэканы некалькіх факультэтаў пабывалі ў ІЧУ, дзе «абмеркавалі з работнікамі ізалятара сытуацыю, якая стварылася, і магчымыя шляхі яе вырашэньня». «Адміністрацыя БДМУ робіць усе захады для вырашэньня гэтай праблемы», — адзначаецца ў распаўсюджанай заяве кіраўніцтва ВНУ.
Акцыі салідарнасьці
Сёньня ва ўнівэрсытэце студэнты правялі акцыю салідарнасьці з затрыманымі. Яны сабраліся ў холе БДМУ з плякатамі і бел-чырвона-белымі сьцягамі. Таксама акцыя салідарнасьці прайшла каля ўваходу ў Мінскі дзяржаўны лінгвістычны ўнівэрсытэт. Студэнты сьпявалі песьні пад гітару, пляскалі. Затрыманых дзяўчат падтрымалі таксама Беларускі дзяржаўны ўнівэрсытэт, Беларускі дзяржаўны эканамічны ўнівэрсытэт і іншыя ВНУ.
