Расейскі мастак Арцём Ласкутоў 26 жніўня, як і абяцаў раней, перавёў у фонды дапамогі ахвярам палітычных рэпрэсій палову грошай ад продажу карціны «Беларусь», прысьвечанай апошнім падзеям у Беларусі. Пра гэта ён паведаміў у Фэйсбуку.
26 жніўня Арцём Ласкутоў перавёў агулам 1,5 мільёна расейскіх рублёў (каля 20 тысяч даляраў) у два фонды па зборы грошай для ахвяраў палітычных рэпрэсій у Беларусі: «Збор дапамогі для ахвяраў рэпрэсій у Беларусі» і Belarus Solidarity Foundation.
14 жніўня мастак прадаў карціну, прысьвечаную жорсткаму здушэньню пасьлявыбарчых акцый пратэсту ў Беларусі, на інтэрнэт-аўкцыёне за 3 мільёны расейскіх рублёў (больш як 40 тысяч даляраў). Перад продажам ён паабяцаў накіраваць палову грошай ад продажу карціны беларусам.
Карціна «Беларусь» уяўляе сабой стылізаваны бел-чырвона-белы сьцяг, выканана ў вынайдзенай самім Ласкутовым у 2019 годзе тэхніцы «дубінапісу» — з выкарыстаньнем міліцэйскай дубінкі. Стварыць новы стыль яго натхніла жорсткае здушэньне пратэстаў у Маскве падчас выбараў у Маскоўскую гарадзкую думу.
