У Жабінцы пахавалі Генадзя Шутава, якому стрэлілі ў галаву падчас акцыі пратэсту ў Берасьці
24 жніўня ў Жабінцы пахавалі 44-гадовага берасьцейца Генадзя Шутава, які памёр 19 жніўня ў вайсковым шпіталі ў Менску. Ён быў паранены ў галаву падчас зачысткі Берасьця пасьля акцыі пратэсту супраць фальсыфікацыі выбараў 11 жніўня каля Маскоўскага райвыканкаму Берасьця. Цалкам чытайце па спасылцы.
Менск: на плошчы Незалежнасьці пачаліся затрыманьні
Увечары 24 жніўня на плошчы Незалежнасьці ля Дому ўраду ў Менску сталі зноў зьбірацца пратэстоўцы. Некаторыя прыйшлі зь бел-чырвона-белымі сьцягамі. Людзі размаўляюць, скандуюць «Жыве Беларусь!», «Свабоду!», выступаюць па чарзе ў фармаце «вольнага мікрафона», сьпяваюць.
Адразу пасьля пачатку збору некалькі чалавек затрымалі супрацоўнікі міліцыі. Мітынг працягваецца, людзі ў цывільным вядуць відэаздымку, міліцыя пакуль ня ўмешваецца ў тое, што адбываецца.
Пазьней затрыманьні на плошчы Незалежнасьці працягнуліся. Пасьля 21-ай гадзіны стала вядома, што там затрымалі актывіста «Эўрапейскай Беларусі» Максіма Вінярскага, а каля 22-ой гадзіны па дарозе з плошчы затрымалі таксама сьвятара не зарэгістраванай у Менску Беларускай аўтакефальнай праваслаўнай царквы Леаніда Акаловіча.
На плошчы Незалежнасьці сёньня таксама затрымалі непаўлетняга актывіста «Маладога фронту» Іларыёна Трусава. Верагодна яго адвезьлі ў РУУС Цэнтральнага раёну Менску, паведамляе праваабарончы цэнтар «Вясна».
У 23.40 праваабаронцы паведамілі, што Іларыён Трусаў і Леанід Акаловіч на волі. Таксама ў Магілёве вызвалілі актывіста «Народнай грамады» Аляксея Барысава.
БСПД заклікала распусьціць Менскі гарсавет і ўвесьці мараторый на гвалт
Беларуская сацыял-дэмакратычная партыя (Грамада) накіравала ліст у Менгарвыканкам і Менскі гарсавет дэпутатаў з патрабаваньнямі спыніць эскаляцыю канфлікту і пачаць дыялёг дзеля кансалідацыі грамадзтва. У сувязі з палітычным крызісам, выкліканым адсутнасьцю свабодных і справядлівых выбараў, БСДП патрабуе прыняць наступныя захады:
- Увесьці паведамляльны прынцып пры правядзеньні масавых мерапрыемстваў на ўсёй тэрыторыі Менску, у тым ліку на цэнтральных плошчах.
- Забясьпечыць доступ прадстаўнікоў палітычных партыяў і грамадзкіх арганізацыяў да мясцовых дзяржаўных СМІ (газэты, радыё, тэлебачаньне) і грамадзка-палітычных перадач.
- Распусьціць Менскі Савет дэпутатаў і правесьці новыя свабодныя і справядлівыя выбары.
- Ініцыяваць стварэньне камісіі расьсьледаваньня ўсіх фактаў выяўленых фальсыфікацыяў падчас прэзыдэнцкіх выбараў з прадстаўнікоў мясцовай улады і праваабарончых арганізацыяў.
- Расьсьледаваць факты непрапарцыйнага ўжываньня сілы пры разгоне мірных дэманстрантаў, ужываньня траўматычнай і агняпальнай зброі, сьлезацечнага газу і вадамётаў, сьвятлашумавых гранат, зьбіцьця і катаваньняў пратэстоўцаў пасьля затрыманьня, забойстваў.
Звольнілі супрацоўніка МЗС, які выйшаў на пікет, каб выказаць сваю пазыцыю наконт сытуацыі ў Беларусі
Супрацоўніка цэнтральнага апарату, начальніка гісторыка-архіўнага аддзяленьня МЗС Вячаслава Казачонка, які выйшаў тыдзень таму на пікет, звольнілі са зьнешнепалітычнага ведамства. Ён распавёў Tut.by, што звольнілі яго па артыкуле 42 Працоўнага кодэксу «у сувязі з грубым парушэньнем сваіх працоўных абавязкаў».
Як стала вядома TUT.BY ад сваіх крыніц, намесьнік начальніка ўпраўленьня Эўразійскай інтэграцыі Алена Копанева, якая выйшла падтрымаць Казачонка на пікеце, таксама больш не працуе ў МЗС.
Вячаслаў Казачонак 17 жніўня выйшаў на адзіночны пікет на прыступкі будынку МЗС, да яго далучылася Алена Копанева. Пікетам зь белымі пустымі лістамі ў руках супрацоўнікі МЗС хацелі «выказаць сваю прынцыповую пазыцыю» па сытуацыі ў Беларусі.
Ціск на Алексіевіч можа дорага абысьціся Лукашэнку, — аглядальнік Свабоды
Некаторыя апошнія крокі паліттэхнолягаў Аляксандра Лукашэнкі, якія мелі на мэце падвысіць ягоны рэйтынг, прывялі да супрацьлеглага — так, выхад з вэрталёту з «калашнікавым» без ражка з патронамі, выклікаў пачуцьці няёмкасьці ў ягоных маскоўскіх прыхільнікаў і трывогу — у заходніх палітыкаў, мяркуе аглядальнік Свабоды Сяргей Навумчык.
Аднак сёньняшняя навіна можа быць гэткім жа моцным ударам па іміджу Лукашэнкі на міжнародным узроўні, як і факты катаваньняў людзей на Акрэсьціна.
У Сьледчы камітэт выклікана Сьвятлана Алексіевіч у якасьці сьведкі ў крымінальнай справе, заведзенай па факце стварэньня Каардынацыйнай рады, у склад якой пісьменьніца ўваходзіць.
Чаму ня варта ўзаемадзейнічаць з узброеным амапаўцам. Тлумачыць псыхоляг, які працуе з агрэсарамі
У чым прычыны жорсткасьці супрацоўнікаў АМАПу да затрыманых? Запыталася ў псыхоляга Рамана Кручкова, які прафэсійна працуе з агрэсарамі ў карэкцыйных групах.
Сьцісла
- Людзі ва ўмовах вакуўму маральных межаў, адсутнасьці заканадаўчай рэакцыі, грамадзкага кантролю могуць ісьці далей і далей, і такія дзеяньні могуць прыводзіць да сумных і трагічных наступстваў.
- Практыка сьведчыць, што людзі, якія ўжываюць празьмерны гвалт або жорстка абыходзяцца са сваімі блізкімі, разумеюць, што яны робяць. У пераважнай большасьці яны псыхічна здаровыя.
- Калі чалавек выходзіць «зараджаным» на выкананьне загаду, то трэба ўсьведамляць, што ён разумее, што робіць, і абсалютна дакладна ня варта ўзаемадзейнічаць зь ім, дакранацца рукамі. І гэта пытаньне не «правакаваньня», а бясьпекі.
Чальцоў прэзыдыюму Каардынацыйнай рады, затрыманых раніцай на МТЗ, ня могуць знайсьці
Дасюль не зразумелая сытуацыя зь месцазнаходжаньнем Сяргея Дылеўскага і Вольгі Кавальковай, затрыманых раніцай на прахадной МТЗ, паведамляе Тэлеграм-канал «Страна для жизни».
У Партызанскім РУУС не пацьвярджаюць, што затрыманыя ў іх, хоць спачатку адвакату Вольгі Кавальковай нібыта казалі, што яна там. Цяпер у РУУС сказалі, што Кавалькова і Дылеўскі ў судзе Заводзкага раёну Менску. У судзе таксама не пацьвердзілі знаходжаньне ў іх затрыманых і сказалі, што ня ведаюць, дзе яны. Па тэлефоне 102 сказалі, што затрыманы Сяргей Дылеўскі ў ІЧУ Акрэсьціна, але на Акрэсьціна гэтую інфармацыю не пацьвердзілі.
Ігар Ляшчэня, які асудзіў катаваньні мірных пратэстоўцаў, вызвалены ад пасады амбасадара Беларусі ў Славаччыне
На мінулым тыдні ён выступіў з асуджэньнем катаваньняў пратэстоўцаў і падаў у адстаўку. Сёньня Лукашэнка звольніў яго з пасады
Пра гэта паведамляе агенцтва БелТА. Ігар Ляшчэня на мінулым тыдні выступіў з публічным зваротам, у якім асудзіў гвалт і катаваньні мірных людзей у Беларусі падчас пратэстаў. 18 жніўня ён падаў у адстаўку з пасады кіраўніка дыпляматычнага прадстаўніцтва Беларусі ў Браціславе. Цяпер яго адстаўка была прынятая.
Сьвятлану Алексіевіч выклікалі ў Сьледчы камітэт у справе аб закліках да «захопу ўлады»
Нобэлеўскую ляўрэатку, пісьменьніцу Сьвятлану Алексіевіч выклікалі 26 жніўня на 14:00 у Сьледчы камітэт у якасьці сьведкі ў крымінальнай справе, заведзенай па факце стварэньня Каардынацыйнай рады, якая нібыта заклікала да захопу ўлады, паведаміла прэс-служба штабу Віктара Бабарыкі.
Сьвятлана Алексіевіч уваходзіць у лік сямі ўдзельнікаў прэзыдыюму Каардынацыйнай рады. Як распавяла Марыя Калесьнікава, праз стан здароўя яна ня можа ўдзельнічаць непасрэдна ў працы прэзыдыюму, але знаходзіцца на пастаяннай сувязі.
Раней у гэтай справе дапыталі іншых сяброў прэзыдыюму Рады Максіма Знака і Сяргея Дылеўскага. На 15 гадзін 24 жніўня на допыт выклікана Лілія Ўласава. На 25 жніўня ў Сьледчы камітэт выклікалі экс-дырэктара Купалаўскага тэатру Паўла Латушку.
Міністэрства фінансаў РФ прапануе абмежаваць дзяржкрэдыты для Беларусі, Армэніі, Вэнэсуэлы і Кубы, — РБК
Міністэрства фінансаў Расеі падрыхтавала правілы, якімі, у выпадку зацьвярджэньня, будзе кіравацца РФ пры выдачы дзяржаўных крэдытаў іншым краінам, паведамляе агенцтва РБК.
Паводле РБК, калі правілы прадастаўленьня дзяржкрэдытаў будуць зацьверджаныя ў тым выглядзе, што прапануе расейскае Міністэрства фінансаў, некалькі традыцыйных даўжнікоў Расеі, у тым ліку Беларусь, больш ня змогуць працягваць запазычваць у яе грошы па агульных правілах. Падрабязнасьці па спасылцы.
На гамельчука, які замяніў чырвона-зялёны сьцяг на бел-чырвона-белы на плошчы Леніна, завялі крымінальную справу
Як піша Міністэрства ўнутраных спраў, затрыманы – 23-гадовы беспрацоўны гамяльчук, якога раней нібыта прыцягвалі да адміністрацыйнай адказнасьці за расьпіваньне алькаголю ў неналежным месцы.
Паводле МУС, здарэньне адбылося 16 жніўня падчас чарговага пратэсту, калі да флагштоку на плошчы Леніна падышлі некалькі чалавек. Адзін зь іх апусьціў сьцяг уніз, а другі зьняў яго, скамячыў, павесіў на агароджу і замяніў на бел-чырвона-белы сьцяг. Ён нібыта патлумачыў сілавікам, што ўчынак быў «балаўством», не зьвязаным з палітычнай і грамадзянскай пазыцыяй.
Справу завялі паводле крымінальнага артыкулу за «зьнявагу дзяржаўнай сымболікі» (арт. 370). Артыкул прадугледжвае пакараньні ад штрафу, арышту ці грамадзкіх работ да абмежаваньня волі на год.
Горадня: плошчу, дзе зьбіраюцца пратэстоўцы, агароджваюць турнікетамі
На Савецкай плошчы ў Горадні, дзе цяпер штовечар зьбіраюцца пратэстоўцы, на палац тэкстыльшчыкаў павесілі вялікі дзяржаўны сьцяг, побач паставілі кальцо для баскетболу. Тэрыторыю вакол месца мерапрыемства агарадзілі. Увечары тут плянуецца акцыя «Запішы дзіця ў спартовую сэкцыю».
Усю Савецкую плошчу агароджваюць турнікетамі. Да таго ж, паставілі турнікеты вакол плошчы Леніна.
Фэдэрацыя футболу папярэдзіла гульцоў, каб не выкарыстоўвалі «палітычныя жэсты» і сымбалі
Беларуская фэдэрацыя футболу разаслала кіраўнікам футбольных клюбаў ліст, у якім папярэдзіла: футбол не павінен выкарыстоўвацца «як пляцоўка для палітычнай прапаганды», піша Tut.by. У лісьце за подпісам генэральнага сакратара фэдэрацыі Сяргея Жардзецкага адзначаецца, што футбол як алімпійскі від спорту «павінен заставацца нэўтральным ў палітычных, рэлігійных, этнічных, расавых і іншых пытаньнях».
«На матчах, якія адбыліся ў пэрыяд з 21 па 23 жніўня, мелі месца выпадкі выкарыстаньня гульцамі жэстаў, прадметаў адзеньня, надпісаў на экіпіроўцы, зьвязаных з адкрытай праявай сваіх палітычных перавагаў. У дадзеных выпадках футбол выкарыстоўваўся ня толькі як сродак для дасягненьня спартыўнага выніку, але і як пляцоўка для палітычнай прапаганды», — заяўляе Жардзецкі ад імя фэдэрацыі. Цалкам чытайце па спасылцы.
Лукашэнка і Пуцін зноў стэлефанаваліся, «працягнулі абмеркаваньне сытуацыі ў Беларусі»
Як піша БелТА, Лукашэнка і Пуцін 24 жніўня «абмеркавалі сытуацыю ўнутры нашай краіны і на зьнешнім контуры, асабліва на заходнім напрамку». Гэта ўжо пятая тэлефонная размова Пуціна і Лукашэнкі пасьля прэзыдэнцкіх выбараў наконт сытуацыі ў Беларусі.
У паведамленьні прэс-службы Крамлю гаворыцца, што Лукашэнка і Пуцін «працягнулі абмеркаваньне сытуацыі ў Беларусі», і Лукашэнка «праінфармаваў» Пуціна пра «захады, што прымаюцца ў мэтах нармалізацыі абстаноўкі ў краіне», і «закраналася тэматыка двухбаковай супрацы ў процідзеяньні каранавіруснай інфэкцыі». З чыёй ініцыятывы адбылася размова, не ўдакладняецца.
У Гомлі на суткі асудзілі журналіста Яўгена Меркіса
У Гомлі на суткі асудзілі журналіста Яўгена Меркіса. Яго затрымалі 21 жніўня, выходныя ён правёў у ізалятары. Міліцыя абвінаваціла журналіста ў парушэньні парадку правядзеньня масавага мерапрыемства — актыўным удзеле ў пікеце.
«21 жніўня я быў у цэнтры гораду, там праходзілі розныя мерапрыемствы. Я ня бачыў прычын, што мне нельга знаходзіцца ў цэнтры гораду. Мяркую, што каб было нешта несанкцыянаванае, то пра гэта б напісалі і папярэдзілі — на сайце гарвыканкаму ці міліцыі», — патлумачыў журналіст.
«Што вы там рабілі?», — удакладніў судзьдзя. «Я размаўляў з людзьмі», — патлумачыў Меркіс. Судзьдзя пастанавіў пакараць журналіста па артыкуле 23.34 КаАП арыштам на 5 сутак. Падрабязнасьці тут.
Токар МТЗ, які страйкаваў з 14 жніўня, мусіў уцячы ў Польшчу ад перасьледу
Рабочы МТЗ Эдуард Сьвянцецкі зьехаў зь Беларусі і праз Украіну дабраўся да Польшчы, дзе зьбіраецца прасіць палітычнага прытулку. Пра гэта Свабодзе паведаміла дачка Эдуарда Сьвянцецкага Паліна, якая жыве ў Варшаве.
«На тату пачалося сапраўдае паляваньне, ён заўважыў за сабой безупыннае сачэньне людзей у цывільным. Дайшло да таго, што „стучаць“ на яго прымусілі мясцовага жыхара, якому даручылі сачыць і паведамляць, з кім тата сустракаецца, дзе бывае. Потым пайшлі пагрозы, што ня проста звольняць за ўдзел у страйку, але і пасадзяць. Днямі тата зьехаў зь Беларусі ва Ўкраіну, а адтуль перабраўся ў Польшчу», — паведаміла дачка рабочага МТЗ.
Эдуард Сьвянцецкі 14 жніўня ён далучыўся да страйку, які рабочыя прадпрыемства пачалі на знак пратэсту супраць фальсыфікацыі прэзыдэнцкіх выбараў. Ён быў сярод тых, хто першым выйшаў з прахадной заводу і расказаў журналістам пра страйк і патрабаваньні рабочых.
Гамельчукі падалі калектыўную скаргу ў Сьледчы камітэт на міліцэйскі гвалт
840 жыхароў Гомля падпісаліся пад зваротам у гарадзкі аддзел Сьледчага камітэту з патрабаваньнем распачаць крымінальную справу супраць міліцыі.
Заяўнікі патрабуюць ад сьледчых распачаць крымінальную справу паводле артыкулу 128 КК — злачынствы супраць бясьпекі чалавецтва.
Пад будынкам камітэту сабраліся жыхары гораду, якія трымалі плякаты з Аляксандрам Віхорам, які памёр пасьля затрыманьня міліцыяй.
Праваабаронцы: у Беларусі аднавілася хваля рэпрэсіяў супраць актывістаў
24 жніўня затрыманьні палітыкаў і актывістаў адбываліся па ўсёй Беларусі.
- Паводле праваабаронцаў «Вясны», у Менску затрымалі сяброў прэзыдыюму Каардынацыйнай рады Вольгу Кавалькову і Сяргея Дылеўскага, а таксама старшыню страйкаму МЗКЦ Аляксандра Лаўрыновіча.
- Чатыром супрацоўнікам Беларускай дзяржаўнай філярмоніі ўручылі позвы ў РУУС, але нібыта ў якасьці сьведак. Усе былі на акцыі салідарнасьці 20 жніўня ля філярмоніі.
- У Салігорску затрымалі сустаршыню страйкаму «Беларуськалію» Анатоля Бокуна.
- У Магілёве затрымалі Аляксандра Папкова, давераную асобу кандыдата ў прэзыдэнты Андрэя Дзьмітрыева. Гэта здарылася, калі ён выйшаў на адзіночны пікет зь бел-чырвона-белым і чырвона-зялёным сьцягамі.
- У Нароўлі схапілі актывіста Мікалая Віткоўскага, якому раней прысудзілі тры дні арышту.
- У Глыбокім і Верхнядзьвінску склалі пратаколы на ўдзельнікаў мірных акцыяў, у тым ліку затрымалі да суду Яраслава Берніковіча і выклікалі ў міліцыю Людмілу Барэйку.
- У Горадні мелі судзіць за «непадпарадкаваньне» Дзьмітрыя Ціта, давераную асобу Сьвятланы Ціханоўскай. Аднак суд перанесьлі на 1 верасьня.
Раўкоў спытаў у беларусаў, якім падабаюцца акцыі салідарнасьці за мяжой, чаму яны не зьяжджаюць
«Не перастаю дзівіцца той пажадлівасьці, зь якой некаторыя «нязгодныя і пратэстоўцы« захапляюцца ў телеграм-каналах з нагоды разнабойнага маханьня сьцяжкамі ў Літве, Польшчы, нават ЗША, Канадзе ў падтрымку пратэстаў у Беларусі», – напісаў дзяржсакратар Савету бясьпекі Беларусі Андрэй Раўкоў у сваім Фэйсбуку.
Паводле дзяржсакратара, нават калі тыя, хто махае сьцягамі – беларусы, то «ўжо даўным-даўно тут не жывуць, нічога не зрабілі для сёньняшняй краіны, а ўвесь іх настальгічны «патрыятызм« раптам успыхвае, калі папросяць».
«У сувязі з гэтым пытаньне да тых, хто так замілаваны замежнымі падскокваньнем: вы чаму там не жывяце, вызваліўшы тут кожны сваё працоўнае месца, месца вашых дзяцей у садку, паменшыўшы нагрузку на настаўнікаў у школе, конкурс у ВНУ і чарга да ўрача? Цяпер на мяне закрычаць: «Гэта наша зямля, родная і непаўторная, мы нікуды не павінны ехаць!« – і гэта правільна, наша. Тады і абапірайцеся на яе, а не на імпартныя эмоцыі». Цалкам чытайце тут.
Ціханоўская абмеркавала палітычны крызіс у Беларусі з намесьнікам дзяржсакратара ЗША
Экс-кандыдатка ў прэзыдэнты Беларусі Сьвятлана Ціханоўская абмеркавала палітычны крызіс у Беларусі з намесьнікам дзяржсакратара ЗША Стывэнам Біганам.
Яна выказала гатоўнасьць вырашыць крызіс праз дыялёг аб мірнай перадачы ўлады, у тым ліку з пасярэдніцтвам міжнародных арганізацый, пры гэтым заклікала ўсе краіны паважаць сувэрэнітэт і тэрытарыяльную цэласнасьць Беларусі. «Толькі народ Беларусі будзе вырашаць сваю будучыню на новых справядлівых і свабодных выбарах», — сказала яна.
Ціханоўская нагадала пра патрэбу «бесстароньняга расьсьледаваньня злачынстваў, учыненых уладамі Беларусі супраць свайго народу».
Сустрэча Ціханоўскай і Бігана адбылася ў Вільні. Пасьля гэтага Біган ляціць у Маскву.