Сэйм Літвы ў аўторак на нечарговай сэсіі прыняў рэзалюцыю, якая заклікае не прызнаваць мінулыя прэзыдэнцкія выбары ў Беларусі і ўвесьці санкцыі для службовых асобаў суседняй краіны.
У зацьверджанай парлямэнтам рэзалюцыі таксама гучыць заклік не прызнаваць легітымнасьць Аляксандра Лукашэнкі. Дакумэнт прыняты амаль аднагалосна — 120 галасоў «за», ніводнага «супраць», два чалавекі ўстрымаліся.
«Мы падтрымліваем выбар беларускага народу, не прызнаем вынікі выбараў 9 жніўня, ня лічым Аляксандра Лукашэнку законным кіраўніком Рэспублікі Беларусі, патрабуем новых, празрыстых, адпаведных дэмакратычных працэдурам парлямэнцкіх і прэзыдэнцкіх выбараў, прапануем ініцыяваць пасярэдніцкую місію, заклікаем ўвесьці пэрсанальныя санкцыі для ўсіх, хто фальшаваў гэтыя выбары, і ўсіх, хто нясе адказнасьць за парушэньні правоў чалавека», — заявіў кансэрватар Жыгімантас Павілёніс, які прадставіў праект рэзалюцыі.
Сёньня пра непрызнаньне выбараў у Беларусі заявілі Вугоршчына, Ірляндыя і Канада.
