Каля 500 чалавек пад бел-чырвона-белымі сьцягамі напярэдадні прайшлі па гістарычным цэнтры Прагі — ад Славянскай бібліятэкі, праз Карлаў мост на Градчанскую і Лярэтанскую плошчы. Каля будынку Міністэрства замежных справаў Чэхіі на Лярэтанскай плошчы адбыўся мітынг.
Праўладная акцыя і пратэсты ў Менску. УЖЫВУЮ
На мітынгу выступалі чэскія палітыкі і прадстаўнікі беларускай меншыні ў Чэхіі. Сярод апошніх былі муніцыпальны дэпутат Андрэй Рамашэўскі, паўнамоцны прадстаўнік беларускай меншыні пры ўрадзе Чэхіі Алена Коварава (Ціхановіч) і іншыя. Выступалі расейскія журналісты Яфім Фіштэйн і Андрэй Курачкін.
Сярод чэскіх палітыкаў, што выступалі на мітынгу, былі дэпутаты чэскага і эўрапейскага парлямэнтаў Робэрт Вэвэрка, Маркета Грэгарава (Пірацкая партыя), Бэньямін Рол (Мільён хвіляў за дэмакратыю),
Выступоўцы заклікалі беларусаў не спыняцца і казалі, што свабода дорага каштуе, а таксама выказвалі салідарнасьць і надзею на перамогу і вяртаньне беларусаў у сям’ю свабодных эўрапейскіх народаў.
Арганізатарамі шэсьця і мітынгу выступілі прадстаўнікі беларускай дыяспары ў Празе — суполкі «Скарына», «Пагоня» і «БлрЧр».
Калёну і мітынг суправаджала і ахоўвала чэская паліцыя, прычым, у адрозьненьне ад Беларусі, рабіла гэта абсалютна бясплатна.
Сёньня а 18-й гадзіне паводле мясцовага часу на Старамесцкай плошчы ў Празе зноў адбудзецца мітынг салідарнасьці зь беларускім народам, на якім будуць выступаць чэскія палітыкі, у тым ліку сэнатары Чэскай рэспублікі.
