Напярэдадні, 15 жніўня, на старонках праўладнай арганізацыі «Белая Русь» у сацыяльных сетках сталі зьяўляцца заклікі прыйсьці ў нядзелю а 12-й на плошчу Незалежнасьці ў Менску на мітынг у падтрымку дзяржаўнага курсу. Чытачы Радыё Свабода з розных рэгіёнаў паведамляюць, што іх прымушаюць паехаць у Менск на гэты мітынг і пагражаюць звальненьнем. Раней удзельнікі акцый супраць фальсыфікацыі выбараў абвяшчалі пра збор на плошчы Незалежнасьці а 14-й гадзіне.
Пампэо: ЗША «актыўна абмяркоўваюць сытуацыю ў Беларусі» з Эўразьвязам
Злучаныя Штаты актыўна абмяркоўваюць сытуацыю ў Беларусі з прадстаўнікамі Эўрапейскага Зьвязу, пасьля таго як на цягам усяго гэтага тыдня беларускія ўлады спрабавалі жорстка здушыць масавыя пратэсты супраць меркаванай фальсыфікацыі выбараў рэжымам Лукашэнкі. Пра гэта заявіў у суботу дзяржсакратар ЗША Майк Пампэо, паведамляе «Голас Амэрыкі».
Выступаючы ў сталіцы Польшчы, якая стала апошняй прыпынкам Пампэо ў часе турнэ па цэнтральнай Эўропе, дзяржсакратар ЗША заявіў, што Вашынгтон адсочвае сытуацыю ў Беларусі, і што мэта ягоных кантактаў зь лідэрамі ЭЗ — гэта «паспрабаваць дапамагчы ўсім, чым можам, каб беларускі народ здабыў сувэрэнітэт і свабоду».
МЗС Украіны заявіла, што «агулам падзяляе» пазыцыю Эўразьвязу па сытуацыі ў Беларусі
У заяве ад 15 жніўня МЗС Украіны не ўдакладняе, ці прызнала вынікі прэзыдэнцкіх выбараў, паводле якіх было афіцыйна абвешчана пра перамогу Аляксандра Лукашэнкі.
«МЗС Украіны заяўляе, што афіцыйна абвешчаныя вынікі выбараў не выклікаюць даверу беларускага грамадзтва. Мы агулам падзяляем пазыцыю, якую выказаў ЭЗ з нагоды выбараў у Беларусі. Украіна надзвычай занепакоеная выпадкамі неабгрунтаванай жорсткасьці супрацоўнікаў праваахоўных органаў супраць грамадзян, якія ўдзельнічаюць у акцыях пратэсту, прадстаўнікоў СМІ і замежнікаў», — гаворыцца ў паведамленьні МЗС.
Назіральніца з Ракава расказала, што адбывалася на выбарчым участку падчас падліку галасоў
Назіральніца Юлія Макінко падзялілася ў інтэрвію інстаграм-акаўнту «Мястэчка Ракаў», што адбывалася 9 жніўня падчас падліку галасоў на ракаўскім участку для галасаваньня № 19. Свабода не змагла апэратыўна праверыць названыя назіральніцай зьвесткі.
- Пяць назіральнікаў, якія засталіся на падліку, сам падлік не бачылі — іх «папрасілі» папіць кавы на другім паверсе;
- Назіральнік бачыла сьлёзы ў некаторых жанчын-членаў камісіі пасьля падліку;
- Дзьверы з участка для галасаваньня ў сельсавет не былі замкнутыя — калі прайшлі назіральнікі, то маглі хадзіць і нейкія іншыя асобы;
- Унізе, дзе ішоў падлік галасоў, быў АМАП і міліцыя.
Чытачы Свабоды паведамляюць, што людзей зь Бересьця і Івацэвічаў вязуць на праўладны мітынг у Менск спэцыяльным цягніком. Таксама нам даслалі відэа, як едуць аўтобусамі з Гомля і Мазыра. Зь Віцебску таксама ідзе цягнік з «прыхільнікамі Лукашэнкі», — піша чытач Свабоды. 200 чалавек на яго пасадзяць у Оршы. Паводле графіку ён павінен прыбыць на Менск-Пасажырскі а 11:24. Цягніку прысвоены нумар 5603 — з дыяпазону нумароў, якія прысвойваюцца цягнікам «состоящих из цельнометаллических вагонов без пассажиров».
На вуліцы Мясьнікова паблізу Плошчы Незалежнасьці карэспандэнт Свабоды заўважыў 20 аўтобусаў з Берасьцейскай вобласьці. Каля іх ходзяць добра апранутыя людзі зь дзяржаўнай сымболікай.
Група людзей, каля 50 чалавек, якія сабраліся ў цэнтры Плошчы Незалежнасьці, скандавалі «За бацьку!», «За Беларусь». Бачныя афіцыйныя беларускія сьцягі і адзін расейскі. Людзей па ўсё плошчы сабралася каля тысячы. Грае музыка.
Тэлеканал «Настоящее время» вядзе чарговую жывую трансьляцыю, прысьвечаную падзеям у Беларусі.
Фота з праўладнай акцыі ў падтрымку Аляксандра Лукашэнкі на плошчы Незалежнасьці
Журналістаў на Плошчу незалежнасьці прапускаюць праз пост міліцыі, людзі ў цывільным пусьцілі ў першую чаргу журналістаў пулаў нумар 1 і нумар 2, іх павялі бліжэй да Дому ўраду. Незалежных журналістаў адвялі на пляцоўку каля Чырвонага касьцёлу. Зьявіліся плякаты: «Беларусь наш агульны дом», «За Беларусь!», «Мы адзіныя, мы непадзельныя», апрача афіцыйных беларускіх ёсьць і савецкія сьцягі.
Плошча Незалежнасьці. Акцыя ў падтрымку Лукашэнкі
На мітынгу ў падтрымку Лукашэнкі прысутнічае старшыня праўладнага Саюзу журналістаў Андрэй Крывашэеў.
Так выглядае акцыя ў падтрымку Аляксандра Лукашэнкі
Сярод транспарантаў на мітынгу на Плошчы Незалежнасьці «Любімую не аддамо», «Паважайце выбар народу», «Лукашэнка – народны прэзыдэнт», «Мы за мір». Многія плякаты людзі нясуць у згорнутым выглядзе, таму прачытаць іх немагчыма. Шмат сьцягоў Белай Русі. Сярод удзельнікаў мітынгу кіраўнік НАН Беларусі Ўладзімер Гусакоў і 30 ягоных супрацоўнікаў, дэпутаты Палаты прадстаўнікоў.
Карэспандэнт Свабоды ўбачыў на плошчы Незалежнасьці былога кіраўніка БТ, кіраўніка «Белай Русі» Генадзя Давыдзьку і кіраўніка праўладнай Фэдэрацыі прафсаюзаў Міхаіла Орду. Давыдзька заявіў на мітынгу: «Радзіма ў небясьпецы».
Удзельнікі мітынгу нэгатыўна рэагавалі, калі чулі беларускую мову з вуснаў журналіста, называлі яго правакатарам і хацелі прагнаць.
«Мы паважаем выбар тых, хто думае ня так, як мы, але патрабуем, каб паважалі і наш выбар. Спыніце шальмаваньне нашых актывістаў. Мы хочам міру! Беларусь – гэта мы», – заявіў на мітынгу кіраўнік «Беларусі Русі» Генадзь Давыдзька.
Людзі аплядуюць і скандуюць «Беларусь – гэта мы», але нядоўга.
У Горадні на Старым замаку вывесілі нацыянальны сьцяг. ФАТАФАКТ
Як прайшла акцыя ў падтрымку Лукашэнкі. ФОТАРЭПАРТАЖ
Эмацыйна выступіў дэпутат Палаты прадстаўнікоў Алег Гайдукевіч: «Калі і праводзіць новыя выбары, то па нашых законах і Канстытуцыі». Гайдукевіч заявіў, што трэба расьсьледаваць кожны выпадак гвалту:
«Зьвяртаюся да кожнага: беларусы, мы браты, мы жылі і будзем жыць у адной краіне… Парлямэнт і ўрад будзе вырашаць, як нам жыць, а ня хунта і ня вуліца».
Радыё Свабода вядзе жывую трансьляцыю
Чарговы прамоўца на мітынгу: «Лукашэнку падставілі халуі, якія намалявалі яму неіснуючыя 80 працэнтаў. Мы разьбярэмся самі, без Захаду і Расеі, нам ня трэба тут другі Данбас. Трэба выпусьціць пацаноў якія па дурасьці трапілі ў турмы, нельга адмазвацца ад людзей». Прамоўца не прадставіўся.
Двое ў цывільным затрымалі чалавека сярэдняга веку, які пачаў скандаваць блізка да трыбуны «Сыходзь!». Яго перадалі. Трымаюць на прыпынку.