Пасьля вызваленьня з турмаў ў Менску і Жодзіне зьнявечаныя, жорстка зьбітыя прыехалі ў шпіталь хуткай дапамогі ў Менску. А валянтэры літаральна завалілі ўвесь прыёмны пакой ежай і неабходнымі рэчамі.

Увечары пятніцы ў прыёмным пакоі сталічнага шпіталя хуткай дапамогі ўтварылася чарга людзей, якія пасьля вызваленьня з Цэнтру ізаляцыі правапарушальнікаў на Акрэсьціна, а таксама з жодзінскай турмы прыйшлі засьведчыць цялесныя пашкоджаньні і траўмы, якія атрымалі ў аўтазаках, аддзяленьнях міліцыі, ізалятарах. Яны маюць цьвёрды намер з вынікамі судова-мэдычнай экспэртызы зьвярнуцца ў Сьледчы камітэт.

Каб прайсьці мэдычную экспэртызу, чакаць у чарзе даводзілася некалькі гадзін. Нягледзячы на позьні час, людзі падыходзілі і падыходзілі.