Кіраўнік Міністэрства інфармацыі Ігар Луцкі на сустрэчы зь дзяржаўнымі і недзяржаўнымі журналістамі 14 жніўня заклікаў іх да «канструктыўнага дыялёгу, які паслужыць далейшым зносінам і прадухіленьню эскаляцыі канфліктных сытуацый», паведамляе БелаПАН.
«Мы супраць неабгрунтаванага гвалту ня толькі ў дачыненьні да журналістаў, але і ўсіх грамадзян», — сказаў Луцкі на сустрэчы, на якой прысутнічала і прадстаўніца Міністэрства ўнутраных спраў Вольга Чамаданава.
Луцкі папракнуў журналістаў недзяржаўных СМІ ў тым, што, скардзячыся на факты затрыманьня і зьбіваньня сваіх супрацоўнікаў, яны ні разу не адрэагавалі на тое, што ў сацсетках у апошнія месяцы было цкаваньне журналістаў дзяржаўных СМІ.
«Я вас не абвінавачваю, але калі мы гаворым пра нейкую кансалідацыю, пра нейкую падтрымку адзін аднаго, дык выкажыце сваё слова ў падтрымку. Бо гвалт вэрбальны можа быць мацнейшы за зьбіваньне. Не глядзіце на мяне так, як быццам бы вы нечаму дзівіцеся. Гэта так на справе, таму я заклікаю да кансалідацыі. Я заклікаю да таго, каб мы ў адной прафэсіі падтрымалі адзін аднаго, а не разышліся ў розныя бакі», — сказаў кіраўнік Міністэрства інфармацыі.
Луцкі таксама заявіў, што некаторыя журналісты ня толькі асьвятляюць вулічныя акцыі, але і бяруць у іх удзел. На просьбу публічна абвясьціць, хто менавіта, ён адмовіўся.
Акрамя таго, Луцкі скрытыкаваў недзяржаўныя СМІ за тое, што яны ніяк не рэагуюць на публікацыі ў тэлеграм-каналах.
«Усё тое, што адбываецца ў тэлеграм-каналах — прамыя заклікі да зьвяржэньня ўлады, нападу на дзяржаўныя органы, зьнішчэньня чыноўнікаў, як яны кажуць — „прыкарытнікаў“, — гэта экстрэмізм у чыстым выглядзе, — заявіў ён. — Ніводнае зь незалежных выданьняў не сказала пра гэта ні слова. Дык будзьце сумленныя і скажыце, што гэта проста вядзе да развалу краіны — тое, што там у гэтых тэлеграм-каналах вяшчаецца. Чаму вы пра гэта ня кажаце?.. Чаму вы ня скажаце пра тое, што гэтыя хлопцы заклікаюць да развалу краіны, да зьвяржэньня ўлады? Гэта абсалютна экстрэмісцкія выразы».
Журналісты запыталіся, якая сувязь паміж заклікамі да зьвяржэньня ўлады і заклікамі да развалу краіны, чаму міністар ставіць «знак роўнасьці паміж гэтымі двума заклікамі». «Улада мяняецца на выбарах, а не на рэвалюцыях», — сказаў Луцкі.
«Калі ў апошні раз зьмянялася, нагадайце», — папрасіў удакладніць рэдактар «Эўрарадыё» Павел Сьвярдлоў. Луцкі не адказаў на гэтую рэмарку.
