У Беларусі забаранілі продаж піратэхнікі
Такую пастанову прыняў Савет Міністраў 11 жніўня. Салюты і пэтарды выкарыстоўвалі пратэстоўцы падчас акцый супраць фальсыфікацыі выбараў. Пратэсты трываюць ужо тры дні. Прадстаўнікі сілавых структураў для разгону пратэстаў кідалі сьвятлашумавыя гранаты і стралялі гумовымі кулямі.
Затрыманы ў Менску ўначы 10 жніўня спэцыяльны карэспандэнт выданьня «Медуза» вярнуўся ў Расею. Яго па беларускай тэрыторыі суправаджалі два супрацоўнікі пасольства РФ.
Тэлеканал «Настоящее время» штодня робіць жывую відэатрансьляцыю, прысьвечанаю падзеям у Беларусі.
Супрацоўнікі Інстытуту фізыкі заявілі пра «італьянскі страйк»
Пра гэта Свабодзе паведаміў старшы навуковы супрацоўнік Іван Сіўцоў. Раніцай 12 жніўня больш за дзясятак супрацоўнікаў Інстытуту фізыкі занялі месца ў фае ўстановы. Перад сабой паставілі плякат з патрабаваньнямі да ўладаў:
— на падставе масавых фальсыфікацый не прызнаваць вынікаў галасаваньня на выбарах прэзыдэнта;
— выпусьціць палітзьняволеных і затрыманых падчас акцый пратэсту ў дзень і пасьля выбараў;
— падключыць інтэрнэт, безь якога праца ў цяперашніх умовах робіцца немагчымай.
Былы прэм’ер-міністар Украіны Яцанюк: «Трэба паапладаваць беларускаму народу»
Пра тое, што адбываецца ў Беларусі і як гэта адрозьніваецца ад падзей Эўрамайдану ва Ўкраіне, вядоўца жывога відэаэфіру тэлеканалу «Настоящее время» Цімур Алеўскі пагутарыў з былым украінскім прэмʼер-міністрам Арсеніем Яцанюком.
Разьбітыя шыбы, вырваная плітка, падпаленая «Табакерка». Як выглядае Серабранка пасьля начных пратэстаў
Затрыманай Крысьціне Вітушцы не даюць жыцьцёва неабходных лекаў
Крысьціне, якая мае цукровы дыябэт, дагэтуль не перадалі жыцьцёва неабходных лекаў. Адваката не пускаюць. Вядомы дзіцячы доктар-рэаніматоляг Андрэй Вітушка і ягоная жонка, маркетоляг і бізнэс-аналітык Крысьціна Вітушка, перасталі выходзіць на сувязь 10 жніўня ўвечары.
«Дыктатар надакучыў, і супраць яго паўстаў народ. Ніякай ролі Расеі тут няма». Расейскі палітоляг пра «сьлед Крамля» ў пратэстах у Беларусі
Расейскі палітоляг Андрэй Калесьнікаў адмаўляе, што ў пратэстах у Беларусі ёсьць «рука Крамля» або яны былі інсьпіраваныя нейкімі сіламі на Захадзе: паводле яго, супраць Лукашэнкі «паўстаў народ», якому «надакучыў дыктатар».
Аднак Андрэй Калесьнікаў прагназуе, што пратэсты ў Беларусі стануць пачаткам «вельмі сур’ёзнай гісторыі і для Лукашэнкі, і для Расеі, і для ўсёй постсавецкай прасторы».
На чым грунтуе свае прагнозы Калесьнікаў? Пра гэта яго распытала карэспандэнт «Настоящего времени» Ірына Рамалійская.
«Медуза»: Пяць прычын, чаму відэа, дзе Ціханоўская заклікае спыніць пратэсты, пастановачнае
Пасьля ад’езду Сьвятланы Ціханоўскай у Літву, у інтэрнэце зьявіліся два яе відэазвароты. У першым, апублікаваным на канале яе мужа, яна глядзіць у камэру і распавядае, што ў яе не было выбару, таму яна вырашыла зьехаць. У другім звароце, выкладзеным у праўладным телеграм-канале, Ціханоўская, чытаючы тэкст па паперцы, заклікае спыніць пратэсты.
Вось, паводле выданьня «Медуза», пяць прычын, чаму гэтае відэа было запісанае пад ціскам.
“Свабодныя людзі – браты”. Акцыя салідарнасьці перад амбасадай Беларусі ў Варшаве. ФОТА
Перад будынкам амбасады Беларусі ў Варшаве 11 жніўня прайшла акцыя салідарнасьці зь беларускім народам, арганізаваная групай палякаў.
Удзельнікі акцыі разьвесілі на агароджы амбасады 15-мэтровы бел-чырвона-белы банэр з надпісамі «Свабодныя людзі — браты» і «Хто забівае аднаго чалавека, той забівае ўвесь сьвет». Яны таксама задзейнічалі дымавыя шашкі ў беларускіх нацыянальных колерах і на астатняй частцы агароджы дамалявалі спрэем чырвоную паласу.
«Я ўпэўнены, што гэты акт падтрымкі, які пакінуў на будынку амбасады трывалы сьлед у форме беларускага сьцяга, якога дагэтуль там не хапае, зацікавіць вас», — сказаў Свабодзе ўдзельнік акцыі Рафал Сушэк, навуковы супрацоўнік факультэту фізыкі Варшаўскага ўнівэрсытэту. — Але перш за ўсё я веру, што ён будзе ўспрыняты беларусамі, якія змагаюцца, як чарговы доказ прысутнасьці сярод палякаў глыбокага ўсьведамленьня ўнівэрсальных каштоўнасьцяў, якія нясе іхнае змаганьне, і нязгоды з таптаньнем чалавечай годнасьці рэжымам дыктатара Лукашэнкі».
Аляксандар Фядута: Генэралам штораз цяжэй аддаваць загады
Тэлеканал «Настоящее время» падчас шматгадзіннага відэаэфіру, прысьвечанага падзеям у Беларусі, пагаварыў з паліттэхнолягам і публіцыстам Аляксандрам Фядутам пра цяперашнія пратэсты ў Беларусі. Гутарку правёў Цімур Алеўскі.
— Як доўга будуць выходзіць людзі на вуліцы Беларусі?
— Я думаю, што ў найбліжэйшыя два дні штосьці стане зразумела, таму што даходзяць самыя розныя навіны, у тым ліку ўжо пачалі гаварыць аб усеагульным страйку. Калі Лукашэнка ўвядзе надзвычайнае становішча, гэта будзе азначаць, што ён узурпатар ня толькі ў вачах уласнага народу, але і ў вачах усяго сьвету. Я думаю, гэта будзе пачаткам яго канца. Мы будзем проста лічыць вельмі хутка дні да таго моманту, калі ён сыдзе.
— Людзям трэба трымацца, каб прымусіць яго зрабіць гэты крок, такую выснову я павінен зрабіць з вашых словаў ці не?
— Уласна кажучы, пачатак ужо зроблены. Ён пазбаўлены легітымнасьці ў вачах беларусаў, усе ведаюць, што Цэнтральная выбарчая камісія схлусіла, калі пачала агучваць вынікі. Таму што на тых 86 участках, дзе старшыні і чальцы камісій адмовіліся выконваць загад і сапраўды падлічылі галасы, ён прайграў Сьвятлане Ціханоўскай, на ўсіх 86 участках. І гэта вельмі сур’ёзны сымптом. Гэта азначае, што калі правесьці сёньня перавыбары ці другі тур, ён іх таксама прайграе.
У крымінальнай справе ў Менску затрымалі выкладчыка Ўнівэрсытэту Джорджа Вашынгтона
У Менску разам з Гарэлікам была ягоная жонка-амэрыканка Марыса, яе не затрымалі,. Дзе цяпер Гарэлік, ніхто ня ведае.
Стас Гарэлік — дактарант Унівэрсытэту Джорджа Вашынгтона. Ягоныя навуковыя інтарэсы — сучасныя аўтарытарныя рэжымы. Апошнім часам ён шмат пісаў пра беларускія выбары. Паводле назіральнікаў, гэта можа быць зьвязана з справай палітэхноляга Віталя Шклярава, якога затрымалі яшчэ перад прэзыдэнцкімі выбарамі.
6 жніўня Аляксандар Лукашэнка сказаў, што сярод затрыманых ёсьць «уладальнікі амэрыканскіх пашпартоў, жанатыя з амэрыканкамі, якія працуюць на Дзярждэп».
Сэнатар выступіў з заклікам да адміністрацыі ЗША адклікаць кандыдатуру на пост амбасадара ў Беларусі
Сэнатар Крыс Мэрфі заклікаў Белы дом зьняць кандыдатуру намесьніка памочніка дзяржсакратара Джулі Фішэр, прапанаваную на пасаду амбасадара ЗША ў Беларусі, у сувязі з пратэстамі, якія праходзяць у гэтай краіне пасьля выбараў прэзыдэнта, інфармуе Інтэрфакс.
АМАП брутальна затрымаў людзей у Лебедзеве Менскай вобласьці
Толькі што ў Лебедзеве (Маладзечанскі раён) АМАП пачаў збіваць і затрымліваць мірных людзей, якія калектыўна неслі зварот у сельвыканкам, паведамляе «Рэгіянальная газэта». Амапаўцы нецэнзурна выражаліся і крычалі на людзей, што яны хочуць прадаць краіну. Сярод людзей быў дэпутат Грымаць, якога таксама забраў АМАП.
АМАП, салдаты, ціхары. Сілавікі на вуліцах у Беларусі — хто яны?
Тэлеканал «Настоящее время» падчас шматгадзіннага відэаэфіру, прысьвечанага падзеям у Беларусі, пагаварыў з праваабаронцам Раманам Кісялёвым зь Менску пра сілавікоў, задзейнічаных у разгоне пратэстаў. Гутарку правёў Цімур Алеўскі.
— Якая колькасць затрыманьняў цяпер ужо на вуліцах?
— Людзі выходзяць на вуліцы ў розных месцах і спрабуюць неяк каардынавацца па меры ходу працэсу. Як вядома, цяпер у Менску, як і ва ўсёй Беларусі, не працуе інтэрнэт і галоўным сродкам камунікацыі зьяўляецца тэлефон.
— Мы бачылі відэа, на якім супрацоўнік АМАПу, пагражаючы бяззбройнай жанчыне загваздкай, якую ён гатовы выцягнуць з гранаты, не падпускае яе да сябе, каб дачакацца аўтобуса — мабыць, не хапае ўжо тэхнікі, — каб затрымаць непаўналетняга. Пагроза загваздкай гранаты прапісаная ў якім правіле якога кодэксу якога падразьдзяленьня, каб разумець, якімі законнымі дзеяньнямі кіруюцца гэтыя людзі цяпер?
— Давайце будзем шчырыя: ніякімі законнымі дзеяньнямі, вядома ж, яны не кіруюцца. Больш за тое, калі назіраць за тым, як праходзілі пратэсты, дакладней, як іх душылі ў мінулыя два дні, ні ў якія разумныя кодэксы і нормы гэта, вядома, не ўкладаецца. Але мы бачылі ня толькі пагрозу выбуху гранаты, мы бачылі канкрэтныя факты выбуху гранат. Сьвятлашумавыя, але яны забіваюць і калечаць людзей. І ў гэтым сэнсе, вядома ж, аб захаваньні нейкіх сур’ёзных нормаў гаварыць не даводзіцца.
Калі ў кучку ўрываецца грузавік — гэта, відавочна, таксама ні ў якім кодэксе не прапісана. І самі супрацоўнікі выдатна разумеюць, што яны дзейнічаюць па-за нормамі права. Але проста ў іх такая мэта і не стаіць. І мы бачым тое, што бачым: пастаўленая канкрэтная мэта — задушыць пратэсты, яны гэтым і займаюцца.
У пятніцу днём кіраўнікі МЗС краін Эўразьвязу правядуць відэасустрэчу ў пытаньні Беларусі і Турэччыны
Пра гэта паведамляе карэспандэнт Радыё Свабода ў Брусэлі Рыкард Юзьвяк.
Раней Польшча выступіла з заклікам правесьці надзвычайны саміт Эўрапейскага зьвязу ў справе Беларусі.
«Нехта мае абудзіць сьвет»: прэзыдэнт Польшчы і Сэйм Літвы зьвярнуліся ў ААН і да сусьветных лідэраў з прычыны падзеяў у Беларусі
Прэзыдэнт Польшчы Анджэй Дуда ў сувязі з падзеямі ў Беларусі 12 жніўня зьвярнуўся зь лістом у Раду правоў чалавека ААН.
Дуда запатрабаваў, каб беларускія ўлады спынілі гвалт у дачыненьні да дэманстрантаў, якія пратэстуюць супраць фальсыфікацыі выбараў прэзыдэнта і вызвалілі ўсіх арыштаваных палітычных зьняволеных.
«Гэта будзе першы ліст у абарону народа Беларусі такога маштабу, — падкрэсьліў кіраўнік кабінэта прэзыдэнта Кшыштаф Шчэрскі. — Прэзыдэнт напісаў ліст усім краінам-сябрам Рады правоў чалавека ААН. Ён накіраваў яго 47-мі краінам сьвету, членам Рады правоў чалавека ААН. Гэта спэцыяльнае ліст: заклік ня быць абыякавымі да сытуацыі ў Беларусі, выказацца».
Камітэт замежных спраў Сэйму Літвы ў сераду таксама прыняў заяву. У ёй выбары ў Беларусі названыя сфальшаванымі і прапануецца не прызнаваць Аляксандра Лукашэнку законным лідэрам Беларусі.
«Камітэт замежных спраў Сэйму падкрэсьлівае, што прэзыдэнцкія выбары, якія адбыліся ў Беларусі 9 жніўня 2020 году, былі сфальсыфікаваныя, — сказана ў заяве. — Камітэт заклікае Сэйм і іншыя адказныя літоўскія інстытуты не прызнаваць вынікі выбараў у Беларусі і прэзыдэнта Лукашэнку ў якасьці законнага лідэра Беларусі».
Мінсувязі Беларусі: доступ да інтэрнэту аднавілі, кампэнсацыі варта разглядаць
Міністэрства сувязі Беларусі заявіла, што з 9 да 11 жніўня «было зафіксаванае значнае абмежаваньне доступу да сэрвісаў і рэсурсаў у абанэнтаў», і адбывалася гэта «ў сувязі з множнымі кібэратакамі на інфраструктуру сетак электрасувязі беларускіх апэратараў і на сайты дзяржаўных органаў».
Пры тым беларусы наракалі на праблемы з доступам да сайтаў незалежных беларускіх выданьняў, замежных сайтаў, сацыяльных сетак і мэсэнджараў — але ня «сайтаў дзяржаўных органаў». Доступ да недзяржаўных беларускіх сайтаў можна было атрымаць з-за мяжы або праз сродкі абыходу блякаваньняў, частка зь якіх не працавала ў Беларусі.
На 12 жніўня, піша Міністэрства, «прынятыя захады далі магчымасьць практычна аднавіць доступ да сэрвісаў і рэсурсаў сеткі Інтэрнэт». Міністэрства рэкамэндавала апэратарам «разгледзець магчымасьць» пераразьліку абанэнцкай платы для пацярпелых карыстальнікаў.
Жаночыя «ланцугі салідарнасьці» праходзяць у Менску, Віцебску, Гомлі, Горадні і іншых гарадах Беларусі. ФОТА, ВІДЭА. Абнаўляецца
Днём 12 жніўня ў шэрагу гарадоў Беларусі пачалі зьбірацца жаночыя «ланцугі салідарнасьці». Першы прайшоў на Камароўцы аб 11-й раніцы — сілавікі сказалі разысьціся, дэманстранткі сышлі з закладзенымі за галаву рукамі, але пазьней ля рынку акцыя аднавілася.