Валянцін Стэфановіч з Праваабарончага цэнтра«Вясна» адказаў на крытыку старшынёй ЦВК Лідзіяй Ярмошынай плятформы альтэрнатыўнага падліку галасоў «Голас».
«Менавіта Цэнтравыбаркам пад кіраўніцтвам Лідзіі Міхайлаўны шмат чаго зрабіў для дэвальвацыі даверу да афіцыйных вынікаў выбараў у нашай краіне, а таксама для страты даверу да ўсяго выбарчага працэсу», — сказаў экспэрт кампаніі «Праваабаронцы за свабодныя выбары» юрыст Валянцін Стэфановіч.
Паводле яго, калі б улады ўкаранілі шматлікія рэкамэндацыі БДІПЧ АБСЭ і нацыянальных незалежных назіральнікаў, зрабілі працэдуру падліку галасоў празрыстай, не ўзьнікала б патрэбы ў падобных грамадзкіх ініцыятывах.
«А ва ўмовах масавага нядопуску назіральнікаў і правядзеньня цалкам закрытых для грамадзкасьці выбараў якраз афіцыйныя зьвесткі ЦВК могуць паслужыць падставай для масавых акцый пратэсту па ўсёй краіне», — адзначыў Стэфановіч.
7 жніўня старшыня ЦВК Лідзія Ярмошына выступіла зь відэазваротам на сайце vybary2020.by. Сярод іншага падчас выступу яна дала сваю ацэнку дзейнасьці інтэрнэт-плятформы «Голас», назваўшы яе «шкодным і злачынным праектам».
«Як нас запэўніваюць, гэта кантроль за волевыяўленьнем грамадзян. Не, дарагія мае, гэта не кантроль. Гэта стварэньне скажонага выніку выбараў для таго, каб дэвальваваць афіцыйныя вынікі галасаваньня і на гэтай падставе арганізаваць масавыя беспарадкі», — заявіла старшыня ЦВК.
Адміністрацыйнай адказнасьцю «Голасу» і падобным онлайн-плятформам прыгразіла і Генэральная пракуратура Беларусі.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
