Цэнтральная выбарчая камісія Беларусі патлумачыла парталу Tut.by, што рашэньне адмовіцца ад вялікага інфацэнтру для прэсы на прэзыдэнцкіх выбарах 9 жніўня канчатковае.
Але ЦВК паабяцала, што «ўся інфармацыя, нават крыху больш», будзе выдавацца.
«Было прынятае рашэньне інфармацыйны цэнтар у традыцыйным фармаце ў Палацы Рэспублікі не ствараць, а абмежавацца працай выдачы інфармацыі з Дому ўраду, — паведаміў 24 ліпеня намесьнік загадчыка аддзелу прававой працы ЦВК Іван Таўкач. — 9 жніўня праца будзе ісьці з Дому ўраду з асноўнымі сродкамі масавай інфармацыі, усё будзе трансьлявацца на сайце Белтэлерадыёкампаніі, БелТА і „СБ“.
Гэта тыя СМІ, якія могуць забясьпечыць трансьляцыі на афіцыйныя рэсурсы. А ўжо ў панядзелак, 10 жніўня, застаецца традыцыйны фармат працы: будзе брыфінг кіраўніцтва ЦВК і прэс-канфэрэнцыі місіяў міжнародных назіральнікаў з прысутнасьцю журналістаў як нацыянальных, так і замежных».
Пры тым ад абвяшчэньня апоўначы папярэдніх вынікаў галасаваньня ЦВК не адмаўляецца, запэўніў Таўкач.
Раней рашэньне адмовіцца ад традыцыйнага прэс-цэнтру патлумачылі пандэміяй каранавірусу. А раніцай 10 жніўня ўсё ж правядуць брыфінг у Палацы Рэспублікі. На пытаньне Tut.by, ці на раніцу пасьля выбараў «каранавірусу ўжо ня будзе», у ЦВК адказвалі, што там будуць «толькі шырока рассаджаныя журналісты, і літаральна на пару прэс-канфэрэнцыяў».
Той жа прычынай — каранавірусам — тлумачылі рашэньне абмежаваць колькасьць беларускіх назіральнікаў на выбарчых участках. Замежныя назіральнікі на беларускіх выбарах будуць толькі ад СНД — назіральнікаў вырашылі не накіроўваць АБСЭ і ПАРЭ.
Арт. 13 Выбарчага кодэксу (галоснасьць пры падрыхтоўцы і правядзеньні выбараў) прадугледжвае, што падрыхтоўка і правядзеньне выбараў прэзыдэнта Рэспублікі Беларусь ажыцьцяўляюцца «адкрыта і галосна», на ўсіх этапах маюць права прысутнічаць прадстаўнікі сродкаў масавай інфармацыі.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
