Аляксандар Лукашэнка зрабіў 13 ліпеня рабочую паездку ў Слаўгарадзкі раён Магілёўскай вобласьці, прысутнічаў на адкрыцьці моста цераз Сож.
УЖЫВУЮ Выбары-2020. Як праходзіць прэзыдэнцкая кампанія падчас пандэміі
Як перадае БелТА, Лукашэнка разважаў пра будаўніцтва дарог: маўляў, «да абласных цэнтраў мы зрабілі дарогі, цяпер трэба прывесьці ў парадак да раённых цэнтраў». Зрабіць гэта трэба ў наступнай «пяцігодцы», казаў ён. Таксама ён анансаваў мадэрнізацыю і будаўніцтва 18 мастоў цягам 3 гадоў, у гэта маюць укласьці $130 млн.
Лукашэнка дадаў, што «Магілёўская вобласьць будзе жыць», калі ў наступнай «пяцігодцы» будзе рэалізаваная праграма разьвіцьця рэгіёну, і «калі зарыентавацца сваечасова, падумаць, якія культуры тут апрацоўваць, гэтая зямля дасьць вынікі стакроць».
Паводле Лукашэнкі, як перадае «СБ. Беларусь сегодня», «страх пасьля катастрофы на Чарнобыльскай АЭС мінуў, і сёньня нараджальнасьць у некаторых „чарнобыльскіх“ раёнах стала ўдвая вышэйшая, чым у іншых».
Аляксандар Лукашэнка ўжо ладзіў сустрэчу з «актывам» Магілёўскай вобласьці месяц таму, 6 чэрвеня. Таксама такія сустрэчы праводзілі ў Горадзенскай, Берасьцейскай і Менскай абласьцях, 29 чэрвеня правёў у Менску сустрэчу з «пэдагагічным актывам», 7 ліпеня — з «актывам» у Менску. На сустрэчы зь дзяржаўнымі СМІ 9 ліпеня ён заяўляў, што такія сустрэчы не перадвыбарчая агітацыя, але праваабаронцы лічаць іначай.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
