Прадстаўнікі амбасады ў Бэрліне і консульства ў Мюнхэне патлумачылі гэта эпідэміялягічнай сытуацыяй. Нямеччына была адным зь нямногіх месцаў, дзе ў выбарчыя камісіі трапілі прадстаўнікі беларускай дыяспары, а ня толькі супрацоўнікі дыпляматычных місій.
У камісію на ўчастку, які месьціцца ў пасольстве Беларусі ў Бэрліне, была выбрана Яўгенія Лявонава, якая працуе ў адным зь нямецкіх онлайн-банкаў. Аднак 10 ліпеня прадстаўнікі пасольства паведамілі ёй, што колькасьць сяброў выбарчай камісіі скарочаная.
Каранавірус у Беларусі і ў сьвеце. Як разьвіваюцца падзеі >>
«Я ўжо была на першым паседжаньні камісіі, і мне прыслалі плян працы на выбары. Але сёньня мне патэлефанавалі і паведамілі такую навіну. Мне сказалі, што прыйшла нота зь Міністэрства замежных спраў Беларусі, што выбары ў Нямеччыне павінны праводзіцца з засьцярогамі ў сувязі з эпідэміялягічнай сытуацыяй. Таму камісію з васьмі чалавек скарацілі да шасьці», — расказала Яўгенія Лявонава Радыё Свабода.
Артур Роо быў адным з двух чалавек, якія «звонку» трапілі ў камісію на ўчастку ў генэральным консульстве ў Мюнхэне. Сёньня іх абаіх таксама выключылі з камісіі, і цяпер у ёй засталося толькі тры чалавекі з консульства, расказаў ён Радыё Свабода.
«Консул сказала, што гэта на падставе эпідэмічнай сытуацыі ў Нямеччыне і пастановы нямецкага ўраду. Я спытаўся, чаму яны кіруюцца нямецкім заканадаўствам на тэрыторыі Рэспублікі Беларусь (маецца на ўвазе тэрыторыя консульства. — РС). На гэта не было ніякага адказу».
УЖЫВУЮ Выбары-2020. Як праходзіць прэзыдэнцкая кампанія падчас пандэміі
