Цэнтральная выбарчая камісія паведаміла агенцтву «Інтэрфакс» 2 ліпеня, што дакумэнты на рэгістрацыю дзейнага кіраўніка дзяржавы Аляксандра Лукашэнкі кандыдатам у прэзыдэнты ўжо пададзеныя.
УЖЫВУЮ Выбары-2020. Як праходзіць прэзыдэнцкая кампанія падчас пандэміі
Пакет дакумэнтаў падаў не асабіста Лукашэнка, а кіраўнік ягонай ініцыятыўнай групы, старшыня Фэдэрацыі прафсаюзаў Беларусі Міхаіл Орда.
Такім чынам, Лукашэнка стаў сёмым (і, імаверна, апошнім) патэнцыйным кандыдатам, які падаў дакумэнты на рэгістрацыю. Раней гэта зрабілі Віктар Бабарыка (22 чэрвеня праз давераную асобу, бо сам знаходзіцца за кратамі), Валер Царкала (24 чэрвеня, але пазьней ЦВК заявіла, што ён не сабраў неабходныя 100 тысяч подпісаў), Ганна Канапацкая (29 чэрвеня), Андрэй Дзьмітрыеў, Сяргей Чэрачань і Сьвятлана Ціханоўская (30 чэрвеня).
Іншыя патэнцыйныя кандыдаты (а да збору подпісаў дапусьцілі 15 ініцыятыўных групаў) не здавалі подпісы за сваё вылучэньне, таму ня будуць зарэгістраваныя нават калі пададуць дакумэнты. Рэгістрацыя кандыдатаў будзе адбывацца ад 5 да 14 ліпеня ўключна.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
