«Чаго ты ўчапіўся ў гэтае крэсла?» Пагаварылі з гамяльчанкай, якая скарыла інтэрнэт на пікеце Ціханоўскага
Гледачоў відэастрыму Свабоды скарыла гамяльчанка Вольга, якая падчас перадвыбарчага пікету Святланы Ціханоўскай 28 траўня раскрытыкавала Аляксандра Лукашэнку і дзейную ўладу. Мы сустрэліся з жанчынай і выслухалі яе пазыцыю.
«У мяне асабіста праблем няма». «Галоўная задача — зьмяніць гэтую ўладу». «Дык чаго баяцца? Страціць свае 300 рублёў?». Што яшчэ казала Вольга ў вялікім інтэрвію Свабодзе, чытайце па спасылцы >>
Гарадзенцы на пікеце, каб падпісацца за Ціханоўскую. ВІДЭА
Жыхары Горадні 29 траўня выстраіліся ў чаргу, каб пакінуць подпіс за Сьвятлану Ціханоўскую, якая вылучаецца кандыдатам на прэзыдэнта.
«Шалудзівы» Ціханоўскі і «кампрамат на Цапкалу»: Лукашэнка выказаўся пра патэнцыйных кандыдатаў на выбарах
Кіраўнік Беларусі Аляксандар Лукашэнка 29 траўня падчас размовы з работнікамі МТЗ адказаў на пытаньне пра сваё стаўленьне і магчымыя сымпатыі да патэнцыйных кандыдатаў на прэзыдэнцкіх выбарах, паведамляе прэс-служба Лукашэнкі.
Ён адзначыў, што ў цэлым «пакуль мала ведае» тых, хто заявіў пра жаданьне ўдзельнічаць у выбарах, за выключэньнем свайго былога памочніка Валера Цапкалы. «Ён, праўда, хітруе. Ня кажа, чаму яго прэзыдэнт звольніў. Але гэта вы ў яго спытайце — чаму я яго звольніў. Хай шчыра раскажа. І яму потым не захочацца ісьці на выбары. Але ён шчыра ня скажа. Трэба — скажам, але мы ня хочам займацца гэтым кампраматам», — сказаў Лукашэнка. Далей чытайце па спасылцы.
У Горадні затрымалі Сяргея Ціханоўскага. ВІДЭА
На выбарчым пікеце Сьвятланы Ціханоўскай у Горадні 29 траўня адбыліся затрыманьні. Затрымалі Сяргея Ціханоўскага, яго апэратара і прыхільнікаў ютуб-канала «Страна для жизни».
Гэта адбылося пасьля таго, як невядомыя жанчыны, якіх сьведкі называлі правакатаркамі, кідаліся на блогера і спрабавалі трымаць яго за вопратку. Яны патрабавалі, каб Ціханоўскі адказаў, чаму ў Горадні няма яго жонкі. Ціханоўскі намагаўся сыйсьці ад жанчын, які хапалі яго за вопратку. Пасьля гэтага зьявілася міліцыя. Супрацоўнікі паспрабавалі затрымаць Ціханоўскага, у выніку чаго адзін зь іх паваліўся на зямлю. Літаральна праз 30 сэкундаў прыбеглі АМАПаўцы і пачалі хапаць Сяргея Ціханоўскага.
Каля паўсотні чалавек сабраліся каля УУС Горадзенскага аблвыканкаму і патрабуюць тлумачэньняў, на якой падставе затрымалі Ціханоўскага і яго прыхільнікаў. Цалкам чытайце па спасылцы.
«Так сказаць можа толькі слабы і залежны чалавек» — Кавалькова і Караткевіч пра заяву Лукашэнкі, што жанчына ня можа быць прэзыдэнтам
Кіраўнік Беларусі заявіў, што «ў нас Канстытуцыя не пад жанчыну» і «грамадзтва не сасьпела для таго, каб галасаваць за жанчыну», «у нас не Літва», дзе Даля Грыбаўскайце «прыйшла, паўсьміхаліся, пасядзела і пайшла». Таму «прэзыдэнтам будзе мужык, я ў гэтым абсалютна перакананы», — заявіў Лукашэнка.
Патэнцыйныя кандыдатка на прэзыдэнта Вольга Кавалькова і кандыдатка на прэзыдэнта на выбарах 2015 году Тацяна Караткевіч адказваюць Аляксандру Лукашэнку на заяву, што жанчына ў Беларусі ня можа быць прэзыдэнтам. Чытаць па спасылцы.
На партал Tut.by адбылася DDoS-атака
На партал Tut.by увечары 29 траўня адбылася DDoS-атака, паведамілі Свабодзе супрацоўнікі кампаніі.
Атака на сайт Tut.by адбылася пасьля публікацыі навіны пра затрыманьні на выбарчым пікеце Сьвятланы Ціханоўскай у Горадні. Затрымалі Сяргея Ціханоўскага, яго апэратара і прыхільнікаў ютуб-канала «Страна для жизни». Кадры затрыманьня Ціханоўскага паказалі ў эфіры перадачы «Панарама» на тэлеканале «Беларусь 1» ужо праз 1,5 гадзіны пасьля затрыманьня.
Абноўлена: Па стане на 22:00 сайт Tut.by аднавіў працу.
БТ апэратыўна паказала затрыманьне Сяргея Ціханоўскага ў Горадні. ВІДЭА
На 42 хвіліне «Панарамы» па канале «Беларусь-1» паказалі затрыманьне блогера Сяргея Ціханоўскага ў Горадні.
Вядоўца «Панарамы» абвінаваціў Ціханоўскага ў тым, што агітацыя і мітынгі яшчэ забароныя, а блогер выставіў у Горадні на плошчы кардонную выяву жонкі Сьвятланы і зьбіраў подпісы.
«Міліцыя, якая паспрабавала навесьці парадак, аказалася ў эпіцэнтры бойкі, якую зладзілі на плошчы. Адзін з супрацоўнікаў міліцыі падвергся нападу», — паведаміў вядоўца.
Затым паказалі прыкладна 1 хвіліну апэратыўнага відэа патасоўкі і затрыманьня Ціханоўскага — як жанчыны правакуюць блогера.
«На гэтых кадрах вы ўсё бачылі самі. Па нашай інфармацыі, зборшчык подпісаў і некаторыя яго прыхільнікі на гэты момант затрыманыя», — завершыў вядоўца «Панарамы».
«На міліцыянта наваліліся. Правакацыя...». Што Лукашэнка сказаў за 4 гадзіны да затрыманьня Ціханоўскага ў Горадні
Кіраўнік Беларусі Аляксандар Лукашэнка 29 траўня падчас размовы з работнікамі МТЗ згадаў сваіх патэнцыйных супернікаў на прэзыдэнцкіх выбарах, у тым ліку пра Сяргея Ціханоўскага. Праз 4 гадзіны пасьля гэтага блогера затрымалі ў Горадні.
Лукашэнка не назваў імя Сяргея Ціханоўскага, які езьдзіць па краіне з пікетамі па зборы подпісаў за сваю жонку Сьвятлану і трансьлюе сустрэчы зь людзьмі на сваім YouTube-канале «Страна для жизни». Але з кантэксту стала відавочна, што меў на ўвазе менавіта яго.
«Мужыкі там кіпіш паднялі, дзесьці хтосьці ходзіць, крычыць. Нядаўна мне прэс-сакратар далажыла: міліцыянта абразіў (удзельнік пікету. — заўвага president.gov.by.), калі яму зрабіў заўвагу. Яны прыяжджаюць крутыя, на джыпах усё — па 10-12 машын. У чужы горад прыехалі, выстраіліся і пайшлі па плошчах, вуліцах... », — сказаў Лукашэнка. — «На гэтага пацанёнка (супрацоўніка міліцыі. — заўвага president.gov.by.) наваліліся. Ён, напэўна, толькі ў гэтым годзе прыйшоў на працу, чыёсьці ж дзіця. Што ты на яго накатваеш. І потым, рызыкоўныя людзі, я б на іх месцы з міліцыяй акуратней быў. Гэта ж карпаратыўны народ. Знойдзе магчымасьць, дык адкажа. Мне ўжо нялёгка прыходзіцца, стрымліваючы іх. Нарываюцца. Правакацыя — гэта найлепшая рэкляма. Яны гэта так разумеюць».
Праз чатыры гадзіны пасьля заявы Лукашэнкі, каля 20.00, Сяргея ЦІханоўскага затрымалі супрацоўнікі спэцназу падчас перадвыбарчага пікету ў Горадні. Абставіны затрыманьня нагадвалі тыя, пра якія раней казаў Лукашэнка.
Чытаць далей
Невядомы мужчына на пікеце Ціханоўскага далікатна кладзе міліцыянта на зямлю. ВІДЭА
У Твітар-акаўнце «Краіны для жыцьця» Сяргея Ціханоўскага зьявілася відэа, на якім бачна, як невядомы мужчына ў скураной куртцы, падчас мітусьні на пікеце ў Горадні, дапамагае легчы на зямлю маладому мужчыне ў міліцэйскай форме.
Менавіта ў выніку гэтай мітусьні падчас збору подпісаў затрымалі блогера Сяргея Ціханоўскага. Гэтаму папярэднічалі агрэсіўныя паводзіны невядомай жанчыны, якая хапала Ціханоўскага за вопратку.
Стала вядома, на што ў шпіталі скардзіўся міліцыянт, якога забрала хуткая зь пікету Ціханоўскай
Чалавека ў форме міліцыі, якога 29 траўня забрала хуткая зь пікету ў падтрымку Сьвятланы Ціханоўскай у Горадні, даставілі ў абласную бальніцу хуткай дапамогі. У яго дыягнаставалі ўдар пярэдняй брушной сьценкі, яго не шпіталізавалі, піша Hrodna.life.
Таксама вядома, што па дапамогу да мэдыкаў зьвярнуўся яшчэ адзін меркаваны супрацоўнік міліцыі. Ён прыйшоў у цывільным адзеньні, але ніякіх цялесных пашкоджаньняў у яго ня выявілі.
«Ён проста на мяне ўпаў». Мужчына патлумачыў, чаму акуратна паклаў на зямлю міліцыянта ў Горадні
Мужчынам у скураной куртцы, які падчас патасоўкі ў Горадні 29 траўня паклаў на зямлю міліцыянта, аказаўся горадзенскім актывістпм Я. (Свабодзе вядомае сапраўднае імя гарадзенца).
Ён расказаў Свабодзе, што адбылося падчас пікету, дзе праходзіў збор подпісаў за патэнцыйную кандыдатку ў прэзыдэнты Сьвятлану Ціханоўскую. Менавіта ў выніку гэтай мітусьні падчас збору подпісаў затрымалі блогера Сяргея Ціханоўскага. Гэтаму папярэднічалі агрэсіўныя паводзіны невядомай жанчыны, якая хапала Ціханоўскага за вопратку.
Горадзенскага актывіста Мікалая Саляніка, які пайшоў падтрымаць Ціханоўскага пад будынкам міліцыі, затрымалі
Святлана Ціханоўская сёньня падасьць скаргі ў ЦВК і МУС
Патэцыйная кандыдатка ў прэзыдэнты Святлана Ціханоўская паведаміла Свабодзе, што яна сёньня падасьць скаргі ў ЦВК і МУС на перашкоды ў зборы подпісаў у яе падтрымку і арышт кіраўніка яе ініцыятыўнай групы.
Лукашэнка пачаў сваю выбарчую кампанію з затрыманьня апанэнтаў
Галоўная выснова з спэцапэрацыі па затрыманьні Сяргея Ціханоўскага ў Горадні палягае ў тым, што Лукашэнка ўзяў курс на сілавы сцэнар правядзеньня кампаніі прэвэнтыўна, задоўга да 9 жніўня. Ня стаў чакаць, ува што выльецца народнае абуджэньне. Каб спыніць у зародку ўсялякія надзеі на перамены, піша палітычны аглядальнік Свабоды Валер Карбалевіч.
Сьцісла
- 29 траўня падчас наведваньня МТЗ Лукашэнка акрэсьліў сваю тактыку падчас выбарчай кампаніі.
- У піяраўскім пляне ягоная тактыка арыентаваная на зьневажэньне, ачарненьне ўсіх апанэнтаў.
- Лукашэнка адкрытым тэкстам назваў Сяргея Ціханоўскага і Віктара Бабарыку прарасейскімі кандыдатамі. Упершыню так адкрыта ён разыгрывае «крамлёўскую карту», выстаўляючы сябе абаронцам беларускай незалежнасьці ад падступнай Расеі.
- Затрыманьне Ціханоўскага адбылося ў выглядзе добра падрыхтаванай спэцапэрацыі, якую Лукашэнка агучыў загадзя.
- Арышт блогера сьведчыць пра тое, што Лукашэнка ўзяў курс на сілавы сцэнар правядзеньня кампаніі.
Што адбываецца ў Горадні пасьля затрыманьня Ціханоўскага. ВІДЭА
У жывым відэаўключэньні з Горадні карэспандэнты Свабоды расказваюць, што адбываецца ў горадзе пасьля затрыманьня напярэдадні блогера Сяргея Ціханоўскага і яго прыхільнікаў.
30 траўня ў Горадні затрымалі Дзьмітрыя Рудзянкова. А 12-й гадзіне ён паехаў у цэнтар гораду забраць свой аўтамабіль, які напярэдадні пакінуў там пасьля затрыманьня Сяргея Ціханоўскага. Дзьмітры пасьпеў паведаміць «Вясьне», што на паркоўцы дзяжурыць АМАП. Жыхар Горадні ня выйшаў на сувязь з праваабаронцамі – быў затрыманы.
Паводле зьвестак «Вясны», агулам у Горадні 29 і 30 траўня затрымалі Сяргея Ціханоўскага, Зьмітра Фурманава, Мікалая Саляніка, Яўгена Рэзьнічэнку, Руслана Джыоева, Станіслава Бакіноўскага, Вяргілія Ушака і яшчэ чатырох чалавек, пра якіх пакуль няма зьвестак.
У Горадні працягваюцца затрыманьні. Ужо прынамсі 12 чалавек у міліцыі
У Горадні затрымалі Дзьмітрыя Рудзянкова. А 12-й гадзіне ён паехаў у цэнтар гораду забраць свой аўтамабіль, які напярэдадні пакінуў там пасьля затрыманьня Сяргея Ціханоўскага.
Лукашэнка пачаў сваю выбарчую кампанію з затрыманьня апанэнтаў
Галоўная выснова з спэцапэрацыі па затрыманьні Сяргея Ціханоўскага ў Горадні палягае ў тым, што Лукашэнка ўзяў курс на сілавы сцэнар правядзеньня кампаніі прэвэнтыўна, задоўга да 9 жніўня. Ня стаў чакаць, ува што выльецца народнае абуджэньне. Каб спыніць у зародку ўсялякія надзеі на перамены.
Сьцісла
- 29 траўня падчас наведваньня МТЗ Лукашэнка акрэсьліў сваю тактыку падчас выбарчай кампаніі.
- У піяраўскім пляне ягоная тактыка арыентаваная на зьневажэньне, ачарненьне ўсіх апанэнтаў.
- Лукашэнка адкрытым тэкстам назваў Сяргея Ціханоўскага і Віктара Бабарыку прарасейскімі кандыдатамі. Упершыню так адкрыта ён разыгрывае «крамлёўскую карту», выстаўляючы сябе абаронцам беларускай незалежнасьці ад падступнай Расеі.
- Затрыманьне Ціханоўскага адбылося ў выглядзе добра падрыхтаванай спэцапэрацыі, якую Лукашэнка агучыў загадзя.
- Арышт блогера сьведчыць пра тое, што Лукашэнка ўзяў курс на сілавы сцэнар правядзеньня кампаніі.