«Калі няма людзей побач, могуць маску прыспусьціць». Як зьбіральнікі подпісаў засьцерагаюць сябе і людзей ад каранавірусу
Цэнтральная выбарчая камісія рэкамэндуе сябрам ініцыятыўных груп падчас збору подпісаў насіць маскі і пальчаткі ды захоўваць сацыяльную дыстанцыю.
Ці выконваецца гэтая рэкамэндацыя і як да яе ставяцца прэтэндэнты на кандыдацтва ў прэзыдэнты? Чытайце па спасылцы >>
Бабарыка: Мы сабралі 50 тысяч подпісаў за тры дні
Удзельнік прэзыдэнцкай гонкі, былы банкір Віктар Бабарыка ў звароце да людзей са сваёй ініцыятыўнай групы паведаміў, што за тры дні сабрана ўжо больш як 50 тысяч подпісаў за яго вылучэньне.
Паводле Бабарыкі, такая вялікая колькасьць сабраная ўпершыню ў гісторыі Беларусі. Пры гэтым ініцыятыўная група Аляксандра Лукашэнкі заяўляла, што за таго сабрана ўжо 200 тысяч подпісаў.
Пікет за Ціханоўскую стаў самым масавым у Магілёве з 1994 году
Каманда патэнцыйнай кандыдаткі ў прэзыдэнты Сьвятланы Ціханоўскай правяла ў Магілёве пікет па зьбіраньні подпісаў у падтрымку вылучэнкі — самы масавы ад 1994 году, калі ў Беларусі быў уведзены інстытут прэзыдэнцтва.
Нечаканасьці на выбарах у Беларусі будуць, але мы пра іх не даведаемся, — былы дарадца Пуціна
Ці ўсё перадвызначана на выбарах у Беларусі? Якую пазыцыю адносна гэтых выбараў зойме Масква? З такімі пытаньнямі мы зьвярнуліся да Глеба Паўлоўскага, расейскага публіцыста, выдаўца, палітоляга, паліттэхноляга, у 1996–2011 гадах — кансультанта расейскіх прэзыдэнтаў Барыса Ельцына і Ўладзіміра Пуціна.
«Я б зьдзівіўся, калі б падчас выбараў Масква распачала адкрытае ўмяшаньне ў выбары на баку нейкіх канкурэнтаў Лукашэнкі. Але ў мяккай форме гэта, безумоўна, будзе», — кажа ён.
Колькі на рахунках прэтэндэнтаў на найвышэйшую пасаду
Цэнтравыбаркам апублікаваў зьвесткі пра паступленьні на выбарчыя рахункі ўдзельнікаў прэзыдэнцкай кампаніі ў Беларусі.
Згодна з заканадаўствам, прэтэндэнты могуць адкрыць спэцыяльныя рахункі, зь якіх фінансуецца дзейнасьць у рамках перадвыбарнай кампаніі. Памер фонду ня можа перавышаць 9 тысяч базавых велічынь, гэта значыць 243 тысяч рублёў.
На гэты момант больш за ўсё сродкаў паступіла на рахунак Віктара Бабарыкі — амаль 155 000 рублёў, зь іх ужо патрачана больш за 23 000. На рахунку Валерыя Цапкалы каля 30 000 рублёў (патрачана 1285). У Ганны Канапацкай — 3 000 рублёў (выдаткавана 2 400). Андрэю Дзьмітрыеву паступілі 2 рублі, астатнім удзельнікам кампаніі — нічога.
Прэтэндэнтам у кандыдаты на выбарах-2020 дазволена адкрываць рахункі цягам усёй кампаніі, рэквізыты апублікаваныя на сайце ЦВК.
Фізычныя асобы маюць права ахвяраваць ня больш за 20 базавых велічынь (540 рублёў), юрыдычныя — ня больш за 50 базавых велічынь (1350). Таксама ўдзельнікі кампаніі могуць сфармаваць фонд за кошт уласных сродкаў.
БНФ не падтрымае ніводнага з кандыдатаў на прэзыдэнцкіх выбарах, будзе назіраць
Упершыню ў гісторыі прэзыдэнцкіх выбараў у Беларусі найстарэйшая апазыцыйная партыя ігнаруе выбарчую кампанію.
Як сказаў Свабодзе старшыня Партыі БНФ Рыгор Кастусёў (на фота), згодна пастановай Сойму прынята рашэньне ня ўдзельнічаць у прэзыдэнцкіх выбарах 2020 году.
Партыя не падтрымае і свах саюзьнікаў па правацэнтрысцкай кааліцыі, якія зарэгістравалі ініцыятыўныя групы для збору подпісаў.
Тым ня менш, адзначыў палітык, Партыя БНФ ня будзе замінаць сваім сябрам, якія далучыліся да ініцыятыўных групаў прэтэндэнтаў на высокую пасаду і цяпер зьбіраюць за іх подпісы. Гэта самастойнае рашэньне кожнага, удакладніў ён.
Таксама Партыя БНФ застаецца дзейным чальцом кампаніі назіраньня «Права выбару». Вылучэнцы будуць адсочваць ня толькі магчымыя фальсыфікацыі ў часе выбарчай кампаніі, але і тое, як выконваюцца захады бясьпекі на выбарчых участках ва ўмовах пандэміі каранавірусу.
Які патэнцыйны кандыдат самы беларускамоўны?
Выбары 2020 году могуць стаць першымі ў гісторыі Беларусі, удзельнічаць у якіх ня будзе нацыянальна-дэмакратычная апазыцыя. На гэты момант да яе можна аднесьці толькі трох з патэнцыйных 14 кандыдатаў — Вольгу Кавалькову, Юрыя Губарэвіча і Мікалая Казлова. Аднак усе яны выбарчую кампанію зьбіраюцца праводзіць выключна ў інфармацыйных мэтах і спыняцца на моманце падачы сабраных подпісаў у ЦВК.
Свабода паспрабавала разабрацца, ці застанецца пасьля гэтага беларуская мова ў выбарчай кампаніі, паназіралўшы за мовай кампаній зарэгістраваных ініцыятыўных груп. Чытайце па спасылцы.
Кіраўнік ініцыятыўнай групы Лукашэнкі адказаў на скаргі аб прымусовым зборы подпісаў
Старшыня Фэдэрацыі прафсаюзаў Беларусі Міхаіл Орда, які ўзначальвае выбарчы штаб Аляксандра Лукашэнкі, адказаў у «Фэйсбуку» на скаргі людзей у сацыяльных сетках пра тое, як у дзяржаўных установах прымушаюць супрацоўнікаў падпісвацца за вылучэньне Лукашэнкі.
«Схема да банальнага простая. „На каленцы“ фабрыкуецца нібыта афіцыйны ліст аб прымусовым уключэньні людзей у ініцыятыўную групу дзейнага прэзыдэнта. Натуральна, на паверку ўсе прозьвішчы і імёны аказваюцца выдуманымі, як і факт прымусовага ўключэньня ў групу», — заяўляе Орда. Цалкам чытайце па спасылцы.
«Гэта не дэжавю». Беларускія выбары 2020 вачыма польскага аналітыка
Размова з Ганнай-Марыяй Дынэр, аналітыкам Польскага інстытуту міжнародных спраў у Варшаве.
Сьцісла:
- сабраць патрэбныя подпісы здолеюць 5–6 кандыдатаў;
- кампанія цікавая перш за ўсё ўдзелам новых гульцоў;
- кампанія цікавая яшчэ і тым, што праходзіць на тле дрэнных беларуска-расейскіх адносін;
- абставіны пандэміі і яе эканамічныя наступствы кепска ўплываюць на рэйтынг Лукашэнкі, хоць ён застаецца выбарчым фаварытам;
- беларусам ужо надакучыла «традыцыйная апазыцыя»;
- наймацнейшы апанэнт Лукашэнкі — Бабарыка.
Артыкул цалкам чытайце па спасылцы.
Хто, калі не Лукашэнка? Спыталі менчукоў на Трактарным заводе. ВІДЭА
Свабода папытала ў мінакоў у раёне Менскага трактарнага заводу, ці бачаць яны альтэрнатыву дзейнаму кіраўніку Беларусі.
Чаму патэнцыйныя кандыдаты ігнаруюць беларускую мову
Беларуская мова на цяперашнім этапе перадвыбарчай кампаніі практычна не гучыць з вуснаў асноўных прэтэндэнтаў. Пад асноўнымі я маю на ўвазе тых, хто прыцягвае найбольшую ўвагу публікі. Гэта Віктар Бабарыка, Сяргей Ціханоўскі, які ўдзельнічае ў перадвыбарчым працэсе праз асобу сваёй жонкі Сьвятланы, а таксама Валер Цапкала. Ад гэтых пэрсонаў чакаюць у блізкай будучыні чагосьці дадатковага, апроч удзелу ў выбарах, піша Севярын Квяткоўскі ў новым блогу. Чытайце па спасылцы.
Жыхары Гомля сталі ў чаргу, каб падпісацца за Сьвятлану Ціханоўскую. ВІДЭА
Жыхары Гомля 28 траўня выстраіліся ў чаргу, каб пакінуць подпіс за Сьвятлану Ціханоўскую, якая вылучаецца кандыдатам на прэзыдэнта.
Эўрадэпутаты заклікаюць беларускія ўлады правесьці дэмакратычныя і бясьпечныя выбары
Дзесяць дэпутатаў Эўрапарлямэнту падпісаліся пад адкрытым лістом, у якім выказваюць салідарнасьць зь беларусамі ў змаганьні з каранавіруснай інфэкцыяй, супраць якой, на іх думку, беларускія ўлады не зрабілі адэкватных захадаў.
«Як абраныя дэпутаты Эўрапарлямэнту і сябры беларускага народу мы хацелі б выказаць захапленьне вашай мужнасьцю і рашучасьцю, праяўленымі ў гэты выпрабавальны час, і такім чынам кампэнсаваць, наколькі гэта магчыма, няздольнасьць беларускай улады ацаніць памер патэнцыйнага распаўсюду COVID-19 і, адпаведна, зрабіць адэкватныя захады. Сьведчаньне гэтага — маштаб самаарганізацыі звычайных грамадзян, якія шчодра дапамагаюць адзін аднаму, а таксама найбольш уразьлівым, і адвага, якую праяўляюць мэдычныя працаўнікі», — пішуць дэпутаты ў лісьце. Цалкам чытайце тут.
Ці паўторыцца сёлета Плошча-2010
Пытаньне ня ў тым, ці адбудзецца сёлета Плошча, а — ці паўторыцца Плошча дзесяцігадовай даўнасьці, з брутальным разгонам, зьбіцьцём, арыштамі соцень людзей і крымінальнымі тэрмінамі для дзясяткаў, у тым ліку і былых кандыдатаў у прэзыдэнты? Разважае Юры Дракахруст. Цалкам чытайце па спасылцы.
Штраф і суткі ў пастарунку. Актывіста ў Мёрах пакаралі за плякат «Выбары без Лукашэнкі і Ярмошынай»
Мёрскі раённы суд аштрафаваў на 135 рублёў мясцовага актывіста БХД Сяргея Васільева. 27 траўня міліцыянты затрымалі Васільева ў цэнтры гораду з плякатам «Выбары без Лукашэнкі і Ярмошынай». Да сёньняшняга суду актывіста трымалі ў мясцовым пастарунку.
«Сяргей праводзіў свой пікет у вельмі людным месцы, там, дзе сустрэчу з жыхарамі ладзіў вядомы блогер Сяргей Ціханоўскі, — сказаў Свабодзе сустаршыня БХД Павал Севярынец. — Мяркую, плякат Васільева „Выбары без Лукашэнкі і Ярмошынай“ амаль за 2 гадзіны пікету пабачылі сотні чалавек, і ён шмат каму прыйшоўся па душы». Цалкам чытайце тут.
Экспэрт расейскага Інстытуту Прымакова: Бабарыка і Цапкала — частка гульні, якая завершыцца захаваньнем пазыцый Лукашэнкам
Сяргей Уткін, кіраўнік групы стратэгічных ацэнак з расейскага Інстытуту ўсясьветнай эканомікі і міжнародных адносін імя Прымакова, адказаў на пытаньні Радыё Свабода пра стаўленьне Расеі да прэзыдэнцкіх выбараў у Беларусі.
Сьцісла:
- Няма падстаў разьлічваць, што гэтыя выбары ў Беларусі стануць «рубежнымі».
- Магчыма і будзе нейкая камунікацыя Расеі з рознымі палітычнымі сіламі ў Беларусі, але пры гэтым важна, каб адносіны з Лукашэнкам засталіся нармальнымі.
- Жаданьне захаваць магчымасьць балянсу паміж Расеяй і Захадам прымусіць беларускае кіраўніцтва праяўляць стрыманасьць.
- Расейскаму кіраўніцтву зручней захоўваць кантакты, напрацаваныя гадамі і дзесяцігодзьдзямі. Маўляў, стары конь баразны не сапсуе.
- Тым, каму Лукашэнка абрыд, ён абрыд яшчэ 15 гадоў таму.
- У Беларусі, у адрозьненьне ад Армэніі, меншая імавернасьць, што нейкая дэстабілізацыя застанецца выключна ўнутраным усплёскам. Адпаведна, большае жаданьне Расеі захаваць стабільнасьць.
Віцебскую прыхільніцу Ціханоўскага аштрафавалі на 810 рублёў за паведамленьне ў чаце
Суд Кастрычніцкага раёну Віцебску аштрафаваў адміністратарку Telegram-каналу «Страна для жизни» Юлію Барсукову на 30 базавых велічыняў (810 рублёў) за адно паведамленьне ў чаце, піша «Віцебская вясна».
Паведамленьне прыхільніцы блогера Сяргея Ціханоўскага зьмяшчала заклік да сходу 10 траўня ў Воршы. Судзьдзя Ўладзімер Царыкаў на падставе міліцэйскага пратаколу зрабіў выснову, што гэта быў заклік на несанкцыянаваную акцыю. Юлія Барсукова не прызнала віны, хоць не адмаўляла, што разьмясьціла паведамленьне. Цалкам чытайце тут.
Ужо абураюцца, але пакуль баяцца. Некалькі высноў пра пачатак выбарчай кампаніі
Беларусь абуджаецца. Здаецца, гэта галоўная выснова, якая дакладна перадае атмасфэру выбарчай кампаніі. Што стала для многіх вялікай неспадзяванкай, разважае аналітык Свабоды Валер Карбалевіч у новым блогу.
Сьцісла:
- Прэзыдэнцкія выбары заўсёды былі чыньнікам, які палітызаваў грамадзтва. Але тое, што адбываецца цяпер, значна перасягае ўсе папярэднія кампаніі.
- Найперш, адбылося абвастрэньне сацыяльна-эканамічных праблем, падзеньне ўзроўню жыцьця, відавочны крызіс беларускай мадэлі. І тое, што на мове афіцыйнага ідэалягічнага канструкту называецца «стабільнасьцю», грамадзтва пачало ўспрымаць як безнадзейнасьць.
- Паводзіны ўладаў падчас пандэміі сталі важным каталізатарам грамадзкага незадавальненьня. Яны чарговым разам засьведчылі, што нават у крытычны момант улада ў прынцыпе ня здольная на шчырую размову з народам.
- Пакуль няма ніякіх прыкметаў эрозіі рэжыму, распаду сыстэмы, расколу эліт.
Лукашэнка: Бабарыку маглі прапанаваць пасаду прэм’ера ў Расеі, не ў Беларусі
Падчас наведваньня 29 траўня Менскага трактарнага заводу Аляксандар Лукашэнка выказаўся пра Віктара Бабарыку, не назваўшы ягонага імя. Былы кіраўнік Белгазпрамбанку нядаўна заяўляў, што хтосьці прапаноўваў яму пасаду прэм’ер-міністра ў абмен на зьняцьце з выбараў. Лукашэнка сказаў, гэта быў ня ён.
«Гэтаму банкіру час падумаць, дзе ён будзе працаваць пасьля выбараў, — сказаў Лукашэнка. — І наогул са школы і вас, і мяне вучылі: ня хлусі. У Беларусі толькі адзін чалавек паводле Канстытуцыі мае права прапанаваць пасаду прэм'ер-міністра і ўнесьці кандыдатуру ў парлямэнт для зацьвярджаньня. Я нікому нічога не прапаноўваў. Тым больш яму. Які досьвед у яго, каб быць прэм'ер-міністрам». Цалкам чытайце па спасылцы.
«Ціханоўскія секлі Маскву ня раз». Пазьняк пра гомельскага блогера, Бабарыку і байкот
У інтэрвію Свабодзе Зянон Пазьняк расказаў, што карыснага робіць блогер Сяргей Ціханоўскі і што яму варта зрабіць, каб не змарнаваць падтрымку людзей. Ён таксама расказаў, чаму скептычна глядзіць на Віктара Бабарыку, і ацаніў шанцы нацыянальна арыентаванай апазыцыі ў дэмакратычных выбарах.
Сьцісла:
- Ціханоўскі не агентура. Ён вырас і сфармаваўся ў дэнацыяналізаваным грамадзтве, але беларускі дзяржаўны патрыятызм у яго ёсьць.
- Важна, каб тое, што адбываецца ў Беларусі з пашырэньнем пратэсту, канструктыўна разьвівалася ў патрэбным сацыяльным і, галоўнае, — нацыянальным кірунку.
- Ня ўсе, хто цяпер прыходзіць да Ціханоўскага, пойдуць за ім у адказны момант. Таму важна правесьці вялікую мабілізацыйную працу.
- Не хачу прынізіць Бабарыку, у яго напэўна ёсьць сваё паняцьце аб сумленьні, але ў палітыцы ім будуць маніпуляваць.
- Давайце гаварыце сур’ёзна, што Лукашэнка зрабіў з нацыяй, зь дзяржавай, з народам, з культурай і эканомікай і як гэта направіць. А не сьмяяцца, як Цапкала, з козачак ды мацёраў.
- Ня трэба баяцца, што падчас пратэстаў у Беларусь прыйдзе Расея. Сьвет зьмяніўся нават за апошні год. І не ў карысьць Расеі.