У выніку перамоваў прэм‘ер-міністраў Літвы, Эстоніі і Латвіі здымуць абмежаваньне на падарожжы паміж краінамі Балтыі з 15 траўня для грамадзянаў гэтых краінаў.
«Нядаўна скончылася паўтарагадзінная відэаканфэрэнцыя з прэм‘ер-міністрам Латвіі Крыш'янісам Карыньшам і кіраўніком ураду Эстоніі Юры Ратасам. Навіна наконт перасячэньня межаў: мы пагадзіліся, што ўсе тры краіны Балтыі належным чынам узялі пад кантроль пашырэньне каранавірусу. Акрамя таго, мы ўзаемна давяраем сыстэмам аховы здароўя нашых краінаў.
Таму з 15 траўня мы здымаем абмежаваньні для грамадзян Літвы, Латвіі і Эстоніі, якія падарожнічаюць паміж краінамі Балтыі. Важна: для грамадзян краінаў Балтыі, якія вяртаюцца зь іншых замежных краін, абавязак двухтыднёвай самаізаляцыі застаецца. Толькі гэта яны змогуць зрабіць у сваіх краінах », — напісаў Сквярняліс у Facebook.
«Нагадваю, што ў панядзелак мы дамовіліся з прэм‘ер-міністрам Польшчы Матэвушам Маравецкім аб адкрыцьці межаў для літоўскіх і польскіх грамадзянаў.
Свабоднае перасячэньне мяжы і патрабаваньне двухтыднёвай ізаляцыі ня будзе распаўсюджвацца на людзей, якія едуць у справах працы, бізнэсу або вучобы. Гэтая палёгка пачне дзейнічаць з 11 траўня», — паведаміў літоўскі прэм’ер.
