Кіраўнік Беларусі Аляксандар Лукашэнка 24 красавіка падпісаў указ № 146, які ўносіць зьмены ў парадак перамяшчэньня празь мяжу тавараў для асабістага карыстаньня, паведамляе прэс-служба Лукашэнкі.
Указ, у прыватнасьці, адмяняе месячныя нормы ў 200 эўра і 31 кг у сукупнасьці на перасылку тавараў з-за мяжы праз пошту, а таксама дастаўку тавараў перавозчыкамі (фізычным асобам).
Пры гэтым па-ранейшаму будуць дзейнічаць разавыя нормы: кошт адной пасылкі не павінен перавышаць 22 эўра, а яе вага — 10 кг.
Таксама адмяняюцца нормы ў 300 эўра і 20 кг бяспошліннага ўвозу тавараў у багажы пры ўезьдзе фізычнай асобы ў Беларусь наземным транспартам часьцей як адзін раз у тры месяцы.
Указ набудзе моц з 1 траўня.
