Беларусь дамовілася з Сусьветным банкам аб выдзяленьні пазыкі ў 90 мільёнаў эўра для процідзеяньня распаўсюджваньню COVID-19, паведамілі агенцтву «Інтэрфакс-Захад» у прэс-службе Міністэрства фінансаў Беларусі.
Грошы накіруюць на закупку рэсьпіратараў, масак, ахоўных касьцюмаў і акуляраў, тэст-сыстэм, апаратаў УГД, ШВЛ, кіслародных канцэнтратараў і рэанімабіляў.
Таксама Мінфін правёў кансультацыі з Эўрапейскім інвэстыцыйным банкам наконт пазыкі ў 50 мільёнаў эўра на патрэбы аховы здароўя.
9 красавіка стала вядома, што Эўразьвяз плянуе выдзеліць Беларусі каля 60 млн эўра на барацьбу з каранавірусам у рамках дапамогі для краінаў Усходняга партнэрства.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
