Беларускія мэдыкі дакладна ведаюць, што і як рабіць у сытуацыі з COVID-19, заявіла ў праграме «Галоўны эфір» на тэлеканале «Беларусь-1» старшыня Савету Рэспублікі Натальля Качанава.
Паводле чыноўніцы, беларускай сыстэме аховы здароўя не патрэбен «лішні кантроль». Мэдыкі цудоўна ведаюць, што і як неабходна рабіць, адзначыла яна, дадаўшы, што ад грамадзян нічога ня ўтойваюць, а лічбы, якія даводзяцца, «абсалютна дакладныя і праўдзівыя».
Качанава заклікала журналістаў «пазьбягаць распаўсюду недакладнай інфармацыі, укідваць фэйкі, якія «абражаюць і крыўдзяць лекараў».
У Беларусі цягам 8-11 красавіка працавала місія Сусьветнай арганізацыі здароўя (САЗ). Як акцэнтавала Натальля Качанава, Аляксандар Лукашэнка запрасіў экспэртаў, каб адкінуць сумневы ў пэўнай часткі грамадзтва з нагоды эфэктыўнасьці захадаў супраць каранавірусу, якія прымаюцца ў краіне.
«Яны казалі пра тое, што мы сапраўды адкрытыя і ўсё, што сёння робіцца ў краіне, заслугоўвае ўсялякай павагі. Экспэрты адзначылі сумленную, адкрытую, прыстойную працу айчынных мэдыкаў і выказалі пажаданьне, каб пра яе больш расказвалі простым беларусам», — сказала Качанава па выніках перамоваў з прадстаўнікамі місіі.
На брыфінгу ў Менску кіраўнік місіі Эўрапейскага рэгіянальнага бюро САЗ Патрык О`Конар заявіў, што беларускаму боку трэба прыкладаць больш намаганьняў для распаўсюду зьвестак пра сытуацыю з CОVID-19.
«Інфармаванасьць важная ня толькі для спэцыялістаў, а і для шырокай грамадзкасці, — падкрэсьліў ён. — Гэта трэба для таго, каб у выпадку неабходнасьці ўвядзеньня новых захадаў насельніцтва разумела, навошта гэта робіцца. Зьвесткі пра эпіднагляд павінны быць дакладныя, адкрытыя і зразумелыя, паведамленыя простай мовай, каб людзі адэкватна рэагавалі на сытуацыю», — адзначыў О`Конар.
