Невядомы 28 сакавіка паведаміў, што у Менску і Менскім раёне нібыта замінаваныя тры гандлёвыя цэнтры.
«Сёньня а 13.30 у сталічную міліцыю перададзенае паведамленьне аб небясьпецы, аналягічнае тым, што паступалі раней. У электронным лісьце пазначаныя тры гандлёвыя аб’екты, разьмешчаныя на тэрыторыі Менску і Менскага раёну — ГЦ Galileo, Diamond і «Замак», — паведаміла афіцыйны прадстаўнік МУС Беларусі Вольга Чамаданава ў сваім тэлеграм-канале.
Да гандлёвых цэнтраў выехалі сапёры ўнутраных войскаў.
Такое ж паведамленьне з інфармацыяй аб замінаваньні гандлёвых цэнтраў Galileo, «Замак» і Diamond city, паступала праваахоўнікам 18 сакавіка.
На аб’екты выяжджалі сапёры і сьледчыя. Выбуховых прыладаў ня выявілі. Была распачатая крымінальная справа аб заведама лжывым паведамленьні пра небясьпеку.
