Міністэрства аховы паведаміла, што ў шпіталізаванага беларускага дальнабойніка ня выявілі каранавірусу, піша Tut.by.
Раней у тэлеграм-канале Nexta зьявілася інфармацыя, што ў пасёлку Прывольны пад Менскам шпіталізавалі кіроўцу фуры, які працуе ў адной з буйных лягістычных кампаній. Сьцьвярджалася, што пасьля вяртаньня з Кітая ў яго рэзка паднялася тэмпэратура. Мэдыкі, якія прыехалі на выклік, былі ў ахоўных камбінэзонах, пацыента перавозілі ў адмысловым ізаляцыйным боксе.
У Міністэрстве аховы здароўя пацьвердзілі, што ў мужчыны сапраўды была крыху падвышаная тэмпэратура (37,1 градус). Цяпер яна нармалізавалася і ён адпачывае ў адмысловым боксе ў лякарні. Каранавірус у пацыента не пацьвердзіўся.
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
