Лукашэнка: Беларусь дамаўляецца пра пастаўкі нафты з ЗША, Саудаўскай Арабіяй і Эміратамі

24 студзень 2020, 14:11 абноўлена 24 студзень 2020, 15:25

Нафтаздабываючая вытворчасьць у Рэчыцы, здымак 2014 году

Аляксандар Лукашэнка 24 студзеня расказаў пра альтэрнатыву расейскім пастаўкам нафты ў Беларусь, піша БелТА.

Якую альтэрнатыву расейскай нафце назваў Лукашэнка?

Пастаўкі праз парты на Балтыцы і адгалінаваньне нафтаправоду «Дружба» ў Гданьску;
Пастаўкі праз Украіну з Чорнага мора;
Пастаўкі з ЗША, Саудаўскай Арабіі і Абʼяднаных Арабскіх Эміратаў.

«Я Пуціну наўпрост сказаў: на першым этапе, калі мы з палякамі дамовімся, будзем рэвэрсам пастаўляць па адной з трох трубаў», — заявіў Лукашэнка.

Ён дадаў, што Расея гэта «чацьвёрты» напрамак, ад якога «мы не адмаўляемся». Але мае адбыцца дывэрсыфікацыя паставак: «не з адной краіны, ад манаполіі, будзем атрымліваць нафту».

Аляксандар Лукашэнка падчас візыту на Завод газэтнай паперы, 24 студзеня

ГЛЯДЗІЦЕ ТАКСАМА:

Лукашэнка: «Нас ракам паставілі па вуглевадародах». ВІДЭА

Расея спыніла пастаўкі нафты ў Беларусь. Што здарылася

1 студзеня 2020 году Расея спыніла пастаўкі нафты ў Беларусь, але расейская нафта працягвае паступаць транзытам празь Беларусь у Эўропу.
Беларусь і Расея дагэтуль не дамовіліся пра пастаўкі нафты ў 2020 годзе, хоць Лукашэнка і Пуцін вялі перамовы 30 і 31 сьнежня.
Прыняты толькі «індыкатыўны балянс»: Расея можа паставіць 24 млн тонаў нафты на год. У 2019-м столькі і паставілі: 18 млн т пайшлі на перапрацоўку, яшчэ 6 млн т на «перамытненьне». Паводле эканаміста Яраслава Раманчука, Беларусі на ўласныя патрэбы хапае 6–7 млн тонаў — астатняе ішло на нафтапрадукты для экспарту або на «перамытненьне».
31 сьнежня 2019 году Лукашэнка даручыў завозіць нафту з партоў Балтыі і залучыць альтэрнатыўныя пастаўкі праз магістральны нафтаправод «Дружба».
Пакуль Мазырскі НПЗ пачаў атрымліваць нафту толькі ад кампаніі расейскага алігарха Гуцэрыева — чакаецца пастаўка ўсяго 750 тысячаў тонаў.
Беларусь дамовілася пра імпарт 80 тонаў нарвэскай нафты Johan Sverdrup з пастаўкай у літоўскі порт Клайпеда. У Беларусі чакаюць пачатку разгрузкі ўвечары 22 студзеня. Перавалка і транспарт да НПЗ чыгункай будуць каштаваць больш за 20 даляраў за тону.
Гатоўнасьць транспартаваць нафту ў Беларусь на пастаяннай аснове ўжо выказалі суседнія Латвія (магчымыя аб’ёмы не абвяшчаліся) і Літва (да 3 млн тонаў на год). Пры чым Літва гатовая дастаўляць і газ. Па стане на 21 студзеня «Белнафтахім» мае «практычна гатовыя кантракты» на альтэрнатыўныя пастаўкі.
Беларускія НПЗ у першай палове студзеня працавалі на леташніх запасах, аб’ёму якіх хапала прыкладна на 20 дзён працы. Экспарт нафтапрадуктаў Беларусь часова прыпыняла ад 1 студзеня, аднавіла ад 21-га.
Паводле неафіцыйных зьвестак «Інтэрфаксу», Беларусь прапанавала рэалізаваць варыянт разавай пастаўкі нафты з рэсурсаў незалежных пастаўшчыкоў з мэтай павелічэньня запасаў сыравіны на НПЗ на час правядзеньня перамоваў.
Публічна ж Лукашэнка 21 студзеня паставіў задачу зьнізіць пастаўкі нафты з Расеі да 30-40% ад неабходных аб’ёмаў: «працэнтаў 30 мы павінны з Балтыкі завозіць і працэнтаў 30 праз Украіну». Пастаўкі з Казахстану, заявіў ён, заблякавала Расея.
Менск і Масква дасюль не ўзгаднілі кампэнсацыю за расейскі падатковы манэўр. У беларускі бюджэт-2020 закладзеныя страты ў памеры 951 млн рублёў.
Расея дагэтуль не кампэнсавала Беларусі страты за пастаўкі бруднай нафты ў красавіку 2019 году — толькі 20 студзеня 2020-га дамовіліся пра падыходы і мэтодыку кампэнсацыі.