Усясьветны банк рэзка пагоршыў прагноз росту ВУП Беларусі

09 студзень 2020, 11:04

Паводле прагнозу Ўсясьветнага банку, беларускі ВУП за 2019 год вырасьце на 1%, за 2020 — на 0,9%, за 2021 і 2022 — на 0,5% за год.

Гэта вынікае з дакладу «Пэрспэктывы ўсясьветнай эканомікі», прэзэнтаванага 9 студзеня, паведамляе БелаПАН.

У чэрвені прагноз быў больш аптымістычным, бо банк разьлічваў, што Расея кампэнсуе Беларусі 50% старатаў ад падаткавага манэўру

2019 — 1,8%
2020 — 1,3%
2021 — 1,2%

Чаму банк пагоршыў прагноз

абмежаваныя магчымасьці стымуляваньня ўнутранага попыту
захаваньне структурных праблемаў
аслабленьне зьнешняга попыту
пагаршэньне ўмоваў гандлю пры захаваньні цяпершаняга ўзроўню дзярждоўгу (і банк не выключае, што Беларусі давядзецца браць новыя пазыкі).

Каб палепшыць становішча, трэба праводзіць структурныя рэформы, зазначаюць эканамісты банку.

Афіцыйны прагноз павялічылі на загад Лукашэнкі

Паводле афіцыйнга прагнозу ўладаў, ВУП Беларусі ў 2019 мусіў вырасьці на 4%, але фактычна за студзень — лістапад вырас на 1,1%. На 2020 год спачатку заплянавалі рост 2,5%, але пасьля крытыкі Лукашэнкі — павялічылі да 2,8%.

Расея спыніла пастаўкі нафты ў Беларусь. Што здарылася

1 студзеня 2020 году Расея спыніла пастаўкі нафты ў Беларусь, але расейская нафта працягвае паступаць транзытам празь Беларусь у Эўропу.
Беларусь і Расея дагэтуль не дамовіліся пра пастаўкі нафты ў 2020 годзе, хоць Лукашэнка і Пуцін вялі перамовы 30 і 31 сьнежня.
Прыняты толькі «індыкатыўны балянс»: Расея можа паставіць 24 млн тонаў нафты на год. У 2019-м столькі і паставілі: 18 млн т пайшлі на перапрацоўку, яшчэ 6 млн т на «перамытненьне». Паводле эканаміста Яраслава Раманчука, Беларусі на ўласныя патрэбы хапае 6–7 млн тонаў — астатняе ішло на нафтапрадукты для экспарту або на «перамытненьне».
31 сьнежня 2019 году Лукашэнка даручыў завозіць нафту з партоў Балтыі і залучыць альтэрнатыўныя пастаўкі праз магістральны нафтаправод «Дружба».
Пакуль Мазырскі НПЗ пачаў атрымліваць нафту толькі ад кампаніі расейскага алігарха Гуцэрыева — чакаецца пастаўка ўсяго 750 тысячаў тонаў.
Беларусь дамовілася пра імпарт 80 тонаў нарвэскай нафты Johan Sverdrup з пастаўкай у літоўскі порт Клайпеда. У Беларусі чакаюць пачатку разгрузкі ўвечары 22 студзеня. Перавалка і транспарт да НПЗ чыгункай будуць каштаваць больш за 20 даляраў за тону.
Гатоўнасьць транспартаваць нафту ў Беларусь на пастаяннай аснове ўжо выказалі суседнія Латвія (магчымыя аб’ёмы не абвяшчаліся) і Літва (да 3 млн тонаў на год). Пры чым Літва гатовая дастаўляць і газ. Па стане на 21 студзеня «Белнафтахім» мае «практычна гатовыя кантракты» на альтэрнатыўныя пастаўкі.
Беларускія НПЗ у першай палове студзеня працавалі на леташніх запасах, аб’ёму якіх хапала прыкладна на 20 дзён працы. Экспарт нафтапрадуктаў Беларусь часова прыпыняла ад 1 студзеня, аднавіла ад 21-га.
Паводле неафіцыйных зьвестак «Інтэрфаксу», Беларусь прапанавала рэалізаваць варыянт разавай пастаўкі нафты з рэсурсаў незалежных пастаўшчыкоў з мэтай павелічэньня запасаў сыравіны на НПЗ на час правядзеньня перамоваў.
Публічна ж Лукашэнка 21 студзеня паставіў задачу зьнізіць пастаўкі нафты з Расеі да 30-40% ад неабходных аб’ёмаў: «працэнтаў 30 мы павінны з Балтыкі завозіць і працэнтаў 30 праз Украіну». Пастаўкі з Казахстану, заявіў ён, заблякавала Расея.
Менск і Масква дасюль не ўзгаднілі кампэнсацыю за расейскі падатковы манэўр. У беларускі бюджэт-2020 закладзеныя страты ў памеры 951 млн рублёў.
Расея дагэтуль не кампэнсавала Беларусі страты за пастаўкі бруднай нафты ў красавіку 2019 году — толькі 20 студзеня 2020-га дамовіліся пра падыходы і мэтодыку кампэнсацыі.