8 сьнежня Беларусь і Расея маюць падпісаць дакумэнты аб «паглыбленай інтэграцыі». Свабода сабрала 10 лічбаў, якія раскажуць пра інтэграцыю болей, чым заявы чыноўнікаў.
1 — столькі разоў напярэдадні «паглыбленай інтэграцыі» Лукашэнка задаваўся пытаньнем «на храна нам такі саюз». Гэта прагучала падчас ягонага галасаваньня на выбарах у Палату прадстаўнікоў.
1 — столькі грамадзкіх кампаній, мэта якіх — спыніць інтэграцыю Беларусі і Расеі, зьявілася ў Беларусі напярэдадні інтэграцыі. Кампанію «Сьвежы вецер» ініцыявалі грамадзкі актывіст Сяргей Бульба, філёзаф Уладзімер Мацкевіч ды іншыя. Пра кампанію ўзгадваў асабіста Лукашэнка.
3 — столькі разоў беларускія чыноўнікі афіцыйна адмаўляліся паказаць дакумэнты аб інтэграцыі, якія плянуюць падпісаць 8 сьнежня.
Адзін раз на запыт дэпутатцы Алене Анісім адмовілі ў Савеце Міністраў і адзін раз — у Мінэканомікі. Таксама ў Мінэканомікі адмовілі ў запыце праваабаронцу Міхаілу Мацкевічу. А ў адказ на ягоную скаргу напісалі, што інтэграцыйныя дакумэнты «для службовага карыстаньня».
5 — столькі месяцаў беларусы і расейцы ня ведаюць, што за «паглыбленую інтэграцыю» прапануюць ім кіраўнікі дзьвюх краін.
18 ліпеня Аляксандар Лукашэнка прапанаваў Уладзіміру Пуціну «зьняць усе пытаньні па інтэграцыі да 10-годзьдзя саюзнай дамовы». І падпісаць 8 сьнежня ўсе дакумэнты па інтэграцыі. Што гэта за дакумэнты, ніхто ня ведае, бо чыноўнікі адмаўляюцца іх паказваць шырокай грамадзкасьці.
5 — як мінімум столькі разоў за 2019 год Лукашэнка ў той ці іншай форме казаў, што «інтэграцыя не закране сувэрэнітэт».
9 — столькі мільярдаў даляраў Беларусь штогод губляе, бо ня мае роўных умоваў гандлю з Расеяй. Такую суму назваў Лукашэнка, калі прыехаў галасаваць на парлямэнцкіх выбарах.
«Гэта значыць, мы прадаём у Расеі менш, чым яны ў нас. Гэтыя грошы трэба зарабіць на расейскім рынку. Але нас туды не пускаюць. Вядома, мы з Расеяй ваяваць ня будзем. Але кожны год мы нешта губляем», — сказаў Аляксандар Лукашэнка.
10 — столькі мільярдаў даляраў Беларусь, па словах чыноўнікаў, страціць ад падатковага манэўру, які праводзіць Расея. І, паводле бюджэту на 2019 год, на кампэнсацыю Беларусь не разьлічвае.
20 — столькі гадоў кіраўнікі Беларусі і Расеі рэалізоўваюць дамову аб Саюзнай дзяржаве. Яна была падпісаная паміж Лукашэнкам і Ельцыным яшчэ 8 сьнежня 1999 году.
100 — столькі мільёнаў даляраў Беларусь згубіла праз пастаўку ў нафтаправод «Дружба» няякаснай расейскай нафты ў красавіку. Такія лічбы назваў беларускі бок (і гэта па мінімуме).
30 000 — столькі ўдзельнікаў зьбіралі акцыі пратэсту супраць інтэграцыі з Расеяй у Менску ў 1990-я. Агулам такіх акцый было каля дзесяці.
Беларуска-расейскі «нафтавы канфлікт». Асноўнае
- 11 красавіка 2019 году Аляксандар Лукашэнка прыгразіў закрыць на рамонт нафтаправод, па якім расейская нафта ідзе ў Эўропу. Гэтак ён адрэагаваў на абмежаваньні, якія Расея ўвяла на імпарт прадуктаў харчаваньня зь Беларусі.
- Гаворка ідзе пра паўднёвую галіну нафтаправоду «Дружба», апэратар якой — ААТ «Гомельтранснафта Дружба». Па ёй ідзе транзыт расейскай нафты ў Польшчу, Украіну, Вугоршчыну, Нямеччыну.
- 21 красавіка Беларусь прыняла рашэньне часова абмежаваць экспарт нафтапрадуктаў, бо беларускія НПЗ атрымалі партыю няякаснай расейскай нафты: узровень хлярыдаў вырас у 20 і больш разоў, сьцьвярджае афіцыйны Менск. На Мазырскім НПЗ заявлі, што няякасная нафта пашкодзіла дарагое абсталяваньне.
- Расейскі бок прызнаў факт пастаўкі няякаснай нафты.
- Беларускі бок заяўляе, што страты ад спыненьня паставак могуць скласьці некалькі сотняў мільёнаў даляраў.
- 23 красавіка намесьнік гендырэктара Беларускай нафтавай кампаніі (БНК) Сяргей Грыб паведаміў, што празь няякасную расейскую нафту Беларусь вымушана прыпыніла экспарт сьветлых нафтапрадуктаў (бэнзін і дызпаліва) ва Ўкраіну, Польшчу і краіны Балтыі.
- Таксама Грыб заявіў, што Беларусь гатовая да канца году пачаць альтэрнатыўныя расейскай пастаўкі нафты: адзін з варыянтаў — праз марскія парты краінаў Балтыі, другі — праз Адэсу і нафтправод Адэса—Броды на Мазырскі НПЗ.
- Пытаньні да якасьці расейскай нафты паўсталі на фоне спрэчак Беларусі і Расеі, калі Масква адхіліла прапанову Менску павялічыць тарыф на транзыт нафты адразу на 23,1% у сувязі з захадамі экалягічнай бясьпекі.
-
26 красавіка расейцы завялі крымінальную справу аб забруджваньні нафты. Меркавана, хлёрарганіку ўкінулі праз прыватны трубаправод у Самарскай вобласьці.
27 красавіка прэмʼер-міністар Расеі Дзьмітры Мядзьведзеў загадаў цягам 7 дзён пакараць адказных за забруджаньне нафты ў трубапровадзе «Дружба».
- 20 стузеня 2020 году Беларусь дамовілася з расейскім бокам пра падыходы і мэтодыку кампэнсацыі за забруджаную нафту
