Дзейны дэпутат Палаты прадстаўнікоў, кандыдат у дэпутаты на сёлетніх выбарах, Ігар Марзалюк распавёў сваім выбаршчыкам пра падтрыхтаваныя 17 варыянтаў Канстытуцыйнага акту.
Пра гэта паведаміў магілёўскі сайт mspring.online.
Пра новую Канстытуцыю Марзалюк распавёў на сустрэчы з выбаршчыкамі ў сярэдняй школе № 40 Магілёва, дзе ён балятуецца ў дэпутаты па 84-й акрузе.
Кандыдат выступаў па-беларуску, сайт mspring.online выклаў аўдыёзапіс выступу.
Ігар Марзалюк сказаў:
— А цяпер самае важнае — чым будзе займацца новы парлямэнт і чым я буду займацца, калі вы мне акажаце давер. Мы яшчэ не адчуваем, што мы знаходзімся на зломе эпох. Беларусь за 25 гадоў прайшла вельмі вялікі, складаны, цяжкі і абсалютна неадназначны шлях. Разам з тым мы захавалі дзяржаву з усімі яе атрыбутамі. Мы змаглі не праваліцца. Але мы выкарыстоўвалі той рэсурс, у тым ліку, скажам так, рэсурс савецкі, які быў.
Таму найважнейшая задача для парлямэнту, для тых, хто прыйдзе — гэта праца над новым варыянтам Канстытуцыі, над новай мадэльлю палітычнай сыстэмы. Ясна, што ўсё гэта будзе праходзіць праз рэфэрэндум. Ясна, што ўсё гэта будзе праходзіць з улікам меркаваньня абсалютнай большасьці грамадзянаў.
У цэлым зьмянілася грамадзтва. Настаўнікі, вядома, гэта адчуваюць. Так, у сваіх аўдыторыях яны адчуваюць гэта вельмі дакладна. Некалькі дзясяткаў тысяч зьявілася даляравых, легальных мільянэраў. Толькі ў адным Менску. Зьмянілася структура грамадзтва. Маса людзей, якія займаюцца малым і сярэднім бізнэсам. Разумная дзяржава, разумеючы зьмену структуры, разумее, што неабходна мяняць і палітычную сыстэму, мяняць Канстытуцыю, у тым ліку.
Ёсьць на сёньняшні дзень 17 розных варыянтаў Канстытуцыйнага акту. Самыя важныя канстытуцыйныя зьмены — гэта пераразьмеркаваньне ўладных функцый, гэта больш улады парлямэнту, які будзе кантраляваць прэм’ер-міністра і ўрад у цэлым, гэта адміністрацыйна-тэрытарыяльная рэформа, рэформа мясцовага самакіраваньня. Менавіта беларуская ўлада, якую абвінавачваюць ва ўсіх грахах, абсалютна асэнсавана пойдзе на вялікую лібэралізацыю, большую свабоду ў гэтым кірунку. Для нас самае галоўнае — захаваць беларускую дзяржаўнасьць, зрабіць Беларусь цалкам легітымнай, адэкватнай краінай у сьвеце, прызнанай усімі.
Як паведамляе mspring.online, таксама 5 лістапада Ігар Марзалюк правёў яшчэ адну сустрэчу з выбаршчыкамі — у сярэдняй школе № 35 у Магілёве.
Падчас гэтай сустрэчы ён сказаў, што сёлетнія парлямэнцкія выбары — «апошнія па мажарытарнай сыстэме».
Марзалюк лічыцца адным з самых набліжаных да Аляксандра Лукашэнкі дэпутатаў Палаты прадстаўнікоў. Многім ён запоўніўся тым, што публічна плакаў ад захапленьня падчас аднаго выступу кіраўніка дзяржавы.
