У час сустрэчы ў Акадэміі кіраваньня 18 кастрычніка Аляксандар Лукашэнка, як вынікае зь відэазапісу дзяржаўнага Агенцтва тэленавінаў, расказаў пра стаўленьне да росту жанчынаў.
Начальніца аддзелу адукацыі Ганцавіцкага райвыканкаму Надзея Здрок спытала (ад 34-й хвіліны на відэа) Лукашэнку пра крытэры ацэнкі эфэктыўнасьці працы дзяржаўных органаў — той прапанаваў адказаць ёй самой на сваё пытаньне. Адказ Лукашэнку спадабаўся, і ён перапытаў, навошта яна пытае яго, калі сама ўсё ведае. Здрок сказала: «Вы ж разумееце, я маленькі чалавек, а вы…»
165–175 см
Аляксандар Лукашэнка не пагадзіўся (на гэтым відэа ад 1:15), адзначыў, што Надзея Здрок не маленькая, а нармальная, бо «жанчыне і ня трэба быць вышэйшай».
«Я ўвогуле не прыхільнік жанчын пад мой рост, пад два мэтры — навошта? — спытаў Лукашэнка. — Жанчына павінна быць 165–175 сантымэтраў, гэта нармальна для жанчын. Я, вядома, ня супраць высокіх-даўганогіх... Таму вы нармальны абсалютна чалавек — з майго пункту гледжаньня».
Ён дадаў, што ведае: рэктар Акадэміі кіраваньня любіць высокіх жанчын.
Сын Віктар на пасадзе асабістага памочніка — не кумаўство
У адказе Надзеі Здрок Аляксандар Лукашэнка таксама заявіў, што не прымае клянавасьці і кумаўства, калі людзей прызначаюць на пасады, бо «гэта давераная асоба», «гэта блізкі». Але тут жа згадаў свайго старэйшага сына Віктара, якога ў 2005 годзе прызначыў памочнікам у нацыянальнай бясьпецы.
«Я яго чаму памочнікам прызначыў? — сказаў Лукашэнка. — Ён часта гэтым карыстаўся. Каб нейкае вельмі вострае актуальнае пытаньне данесьці да прэзыдэнта на працягу некалькіх гадзін. І я не пашкадаваў: я атрымліваў адкрытыя, сумленныя, непрыгладжаныя пытаньні».
43-гадовы Віктар Лукашэнка таксама займае ад 2007 году крэсла ў Радзе бясьпекі Беларусі, з красавіка 2019 году зьяўляецца выканаўцам абавязкаў першага віцэ-прэзыдэнта Нацыянальнага алімпійскага камітэту (прэзыдэнтам там ад 1997 году сам Аляксандар Лукашэнка).
Брат Віктара, 39-гадовы Дзьмітры Лукашэнка — таксама чалец Нацыянальнага алімпійскага камітэту, старшыня цэнтральнай рады «Прэзыдэнцкага спартовага клюбу».
15-гадовы Мікалай Лукашэнка, які нарадзіўся ад іншай маці, цяпер вучыцца ў школе. Паводле ягонага бацькі, ён «занадта апазыцыйны» для таго, каб паступаць у Акадэмію кіраваньня.
