Колькасьць ахвяраў у выніку сутыкненьняў у лягеры дэманстрантаў у сталіцы Судану Хартуме ўзрасла да 100. Пра гэта паведамляе Бі-бі-сі са спасылкай на мэдыкаў зь ліку апазыцыі. Удакладняецца, што целы 40 чалавек былі знойдзены ў рацэ Ніл.
Цяпер Суданам кіруе Найвышэйшая вайсковая рада, якая складаецца з 10 чалавек. Вайскоўцы і прадстаўнікі апазыцыі на працягу некалькіх тыдняў вялі перамовы аб тым, хто павінен кіраваць ў пераходны пэрыяд пасьля зьвяржэньня прэзыдэнта Умара аль-Башыра ў красавіку гэтага году.
Яны дасягнулі прынцыповай згоды аб стварэньні вайскова-цывільнага пераходнага ўраду, які павінен прывесьці краіну да свабодных выбараў. Паводле брытанскага выданьня The Guardian, апазыцыя настойвае на 8 з 15 месцаў у пераходнай радзе, вайскоўцы ж хочуць захаваць большасьць за сабой.
Апазыцыя заклікала да хутчэйшага стварэньні пераходнага ўраду і пачала страйк каля міністэрства абароны. 3-га чэрвеня суданская армія пачала разгон лягера пратэстоўцаў. Вайскоўцы ўжылі зброю.
Восем краін Эўразьвязу асудзілі прымяненьне сілы ў адносінах да дэманстрантаў і заклікалі да хутчэйшага стварэньня ў Судане цывільнага ўраду.
