На думку кіраўніка беларускага Цэнтру стратэгічных і зьнешнепалітычных дасьледаваньняў Арсеня Сівіцкага, са статусам віцэ-прэм’ера Ўладзімер Сямашка зможа больш актыўна бараніць інтарэсы Беларусі ў Маскве.
Пасол Уладзімер Сямашка стаў намесьнікам прэм’ера ў пытаньнях расейска-беларускіх адносін, адпаведны ўказ 30 траўня падпісаў Аляксандар Лукашэнка. Цяпер Уладзімер Сямашка мае такі ж статус, як меў спэцпрадстаўнік Пуціна Міхаіл Бабіч, лічыць кіраўнік Цэнтру стратэгічных і зьнешнепалітычных дасьледаваньняў Арсень Сівіцкі.
«Гэтае прызначэньне зроблена, каб надаць Сямашку дадатковых паўнамоцтваў, па аналёгіі з спэцпрадстаўніком Уладзіміра Пуціна. Гэта своеасаблівы адказ Беларусі на статус спэцпрадстаўніка ў Бабіча. Сямашка будзе ўдзельнікам некалькіх груп па інтэграцыі Беларусі і Расеі. Але Беларусь успрымае гэтую інтэграцыю, як інкарпарацыю. Таму Ўладзімер Сямашка будзе адказваць за эфэктыўнае адстойваньне інтарэсаў Беларусі падчас перамоўных працэсаў».
Наўпрост Уладзімер Сямашка будзе бараніць сувэрэнітэт Беларусі ў камісіях па інтэграцыі і крамлёўскіх кабінэтах, упэўнены Арсень Сівіцкі.
«Ён будзе перашкаджаць спробам Расеі навязаць такі фармат інтэграцыі, які б падрываў нацыянальныя інтарэсы і сувэрэнітэт. Наколькі гэта эфэктыўна атрымаецца — невядома. Відаць, Аляксандар Лукашэнка гэты крок робіць, каб узмацніць ягоны статус. Бо не заўсёды расейскі бок жадае зь ім размаўляць, а цяпер, з такім статусам, ягоныя запыты і прапановы не змогуць ігнараваць».
Мінулы пасол Расеі ў Беларусі Міхаіл Бабіч апроч іншага меў статус спэцпрадстаўніка Ўладзіміра Пуціна. Ён езьдзіў па Беларусі, сустракаўся з палітыкамі і праваахоўнікамі. Яго дзеяньні ня раз крытыкаваў беларускі МЗС, а на сваёй пасадзе Бабіч прабыў толькі 8 месяцаў.
Беларуска-расейскі «нафтавы канфлікт». Асноўнае
- 11 красавіка 2019 году Аляксандар Лукашэнка прыгразіў закрыць на рамонт нафтаправод, па якім расейская нафта ідзе ў Эўропу. Гэтак ён адрэагаваў на абмежаваньні, якія Расея ўвяла на імпарт прадуктаў харчаваньня зь Беларусі.
- Гаворка ідзе пра паўднёвую галіну нафтаправоду «Дружба», апэратар якой — ААТ «Гомельтранснафта Дружба». Па ёй ідзе транзыт расейскай нафты ў Польшчу, Украіну, Вугоршчыну, Нямеччыну.
- 21 красавіка Беларусь прыняла рашэньне часова абмежаваць экспарт нафтапрадуктаў, бо беларускія НПЗ атрымалі партыю няякаснай расейскай нафты: узровень хлярыдаў вырас у 20 і больш разоў, сьцьвярджае афіцыйны Менск. На Мазырскім НПЗ заявлі, што няякасная нафта пашкодзіла дарагое абсталяваньне.
- Расейскі бок прызнаў факт пастаўкі няякаснай нафты.
- Беларускі бок заяўляе, што страты ад спыненьня паставак могуць скласьці некалькі сотняў мільёнаў даляраў.
- 23 красавіка намесьнік гендырэктара Беларускай нафтавай кампаніі (БНК) Сяргей Грыб паведаміў, што празь няякасную расейскую нафту Беларусь вымушана прыпыніла экспарт сьветлых нафтапрадуктаў (бэнзін і дызпаліва) ва Ўкраіну, Польшчу і краіны Балтыі.
- Таксама Грыб заявіў, што Беларусь гатовая да канца году пачаць альтэрнатыўныя расейскай пастаўкі нафты: адзін з варыянтаў — праз марскія парты краінаў Балтыі, другі — праз Адэсу і нафтправод Адэса—Броды на Мазырскі НПЗ.
- Пытаньні да якасьці расейскай нафты паўсталі на фоне спрэчак Беларусі і Расеі, калі Масква адхіліла прапанову Менску павялічыць тарыф на транзыт нафты адразу на 23,1% у сувязі з захадамі экалягічнай бясьпекі.
-
26 красавіка расейцы завялі крымінальную справу аб забруджваньні нафты. Меркавана, хлёрарганіку ўкінулі праз прыватны трубаправод у Самарскай вобласьці.
27 красавіка прэмʼер-міністар Расеі Дзьмітры Мядзьведзеў загадаў цягам 7 дзён пакараць адказных за забруджаньне нафты ў трубапровадзе «Дружба».
- 20 стузеня 2020 году Беларусь дамовілася з расейскім бокам пра падыходы і мэтодыку кампэнсацыі за забруджаную нафту
