Вэнэсуэла атрымлівае грошы ад продажу нафты ў абыход санкцый ЗША пры дапамозе расейскай дзяржаўнай карпарацыі «Роснефть», паведаміла агенцтва Reuters са спасылкай на свае крыніцы.
Паводле інфармацыі агенцтва, вэнэсуэльская дзяржаўная нафтавая кампанія PDVSA перадае кампаніі «Роснефть» свае рахункі-фактуры ад продажу нафты. Пэрыяд аплаты ў такіх угодах звычайна ад 30 да 90 дзён, аднак расейская кампанія пералічвае грошы неадкладна, адзначае Reuters. «Роснефть» аплачвае вэнэсуэльскую нафту са зьніжкай, а пасьля атрымлівае яе поўную цану ад канчатковага пакупніка.
ЗША ўвялі санкцыі супраць PDVSA, каб паралізаваць экспарт нафты з Вэнэсуэлы і пазбавіць валютных паступленьняў рэжым прэзыдэнта Нікаляса Мадура, якога ЗША ня лічаць легітымным кіраўніком дзяржавы.
У сакавіку дзяржсакратар ЗША Майк Пампэо заявіў, што «Роснефть» працягвае купляць сырую нафту ў PDVSA насуперак амэрыканскім санкцыям. PDVSA, паводле Пампэо, стала пэрсанальным банкаматам для рэжыму Мадура, а таксама для расейскіх алігархаў і клептакратаў.
Злучаныя Штаты не прызнаюць легітымнасьць прэзыдэнта Вэнэсуэлы Нікаляса Мадура, якога падтрымлівае Расея. Паводле ЗША, законны лідэр Вэнэсуэлы — кіраўнік парлямэнту Хуан Гуайдо. Пампэо заяўляў, што ЗША будуць дабівацца сыходу Мадура і «аднаўленьня дэмакратыі» ў Вэнэсуэле. Ён не выключаў, што для гэтага могуць спатрэбіцца і вайсковыя захады.
Большая частка лацінаамэрыканскіх краінаў прызнала Гуайдо легітымным кіраўніком дзяржавы. Аднак ад часу, як Гуайдо з студзені абвясьціў сябе часовым прэзыдэнтам, да яго так і не перайшла рэальная ўлада ў краіне.
