Паўночнакарэйскі лідэр Кім Чэн Ын 17 красавіка асабіста назіраў за выпрабаваньнямі новай тактычнай кіраванай зброі. Пра гэта раніцай 18 красавіка паведаміла дзяржаўнае Цэнтральнае тэлеграфнае агенцтва КНДР — ЦТАК.
У паведамленьні ЦТАК не ўдакладняецца, што менавіта было выпрабаванае — ракета ці іншы тып узбраеньняў. Пад словам «тактычны» звычайна маецца на ўвазе ўзбраеньне зь невялікім радыусам дзеяньня, у адрозненьне ад балістычных ракет вялікай далёкасьці.
Новае ўзбраеньне абсталяванае «магутнай боегалоўкай», а таксама валодае «асаблівым рэжымам кіраванага палёту», сьцьвярджаюць у ЦТАК.
Агенцтва прыводзіць цытату Кім Чэн Ына, які заявіў, што «завяршэньне распрацоўкі сыстэмы ўзбраеньняў выключна важнае для павелічэньня баявой моцы» паўночнакарэйскай арміі.
Кім Дон Юб, вайсковы экспэрт з Інстытута далёкаўсходніх дасьледаваньняў пры Унівэрсытэце Кенам у Сэуле кажа, што выпрабаваньне «праводзілася ў розных рэжымах стральбы па розных цэлях». Паводле экспэрта, гэта, хутчэй за ўсё, азначае, што зброя магла быць запушчаная зь зямлі, мора і паветра, і вельмі верагодна, што гэта крылатая ракета меншай далёкасьці.
У лістападзе 2018, згодна з паведамленьнямі паўночнакарэйскіх выданьняў, Кім Чэн Ын таксама прысутнічаў пры выпрабаваньні тактычнай зброі, нібыта здольнай абараніць КНДР у якасьці «сталёвай сьцяны». Выгляд гэтага ўзбраеньня таксама пакуль не ўдалося ўстанавіць.
Паводле высокапастаўленага прадстаўніка адміністрацыі Трампа, Паўночнаамэрыканскае і Стратэгічнае камандаваньне Ўзброеных сіл ЗША не зарэгістравалі ракетных запускаў з тэрыторыі Паўночнай Карэі. Чыноўнік, які гутарыў з Reuters на ўмовах ананімнасьці, дадаў, што цяпер вядзецца дадатковая праверка.
Афіцыйны прадстаўнік Арміі ЗША Дэйв Істбэрн пацьвердзіў, што ў Пэнтагоне ўжо ведаюць аб паведамленьні ЦТАК. У Дзярждэпартамэнце на запыт Reuters пакуль не адказалі.
