У Парыжы часткова згарэў сабор Парыскай Божай Маці, унікальны помнік архітэктуры, якому 850 гадоў. Свабода прыгадала, якія гістарычныя будынкі гарэлі ў Беларусі за апошнія 40 гадоў і што зь імі стала цяпер.
Notre-Dame
Магутны пажар увечары 15 красавіка зьнішчыў усе драўляныя канструкцыі даху ў саборы Парыскай Божай Маці. Абрынуўся шпіль.
Прычыны пажару пакуль невядомыя. Тэлеканал France 2 паведаміў, што паліцыя разглядае пажар як ненаўмысны.
Уратавалі
Закінуты маёнтак Алёшаў на Палесьсі (2016 год)
У 2016 годзе гарэў маёнтак Алёшаў у вёсцы Нова-Беражное ў Столінскім раёне Берасьцейскай вобласьці. Уратаваць будынак удалося рабочым мясцовага віннага заводу. Рэканструяваць сядзібу так і не пачалі, гісторыка-культурная каштоўнасьць занядбаная.
Менскі Дом ураду (2016)
Будынак, зроблены па праекце знакамітага Іосіфа Лангбарда, гарэў у 2016 годзе. Пажар быў на даху, гмах значна не пацярпеў.
Сынагога ў Горадні (2013)
У 2013 годзе моцны пажар здарыўся ў будынку Горадзенскай сынагогі XVI стагодзьдзя. Памяшканьне было пашкоджанае знутры, звонку сьцены амаль не пацярпелі. Будынак удалося аднавіць.
Палац Умястоўскіх (2012)
Палацавы комплекс Умястоўскіх у вёсцы Жамыслаў Івейскага раёну Горадзенскай вобласьці загарэўся ў 2012 годзе. Агонь зьнішчыў частку даху. У 2015 годзе комплекс набыў бізнэсовец зь Ярданіі, заплаціў задатак, а потым зьнік і не займаўся рэканструкцыяй. Рэканструяваць палац і аднаўляць яго пасьля пажару пачалі толькі сёлета.
Фарны касьцёл у Горадні (2006)
Пажар у фарным касьцёле Францыска Ксавэрыя ў Горадні здарыўся ў ліпені 2006 году. Агонь пашкодзіў драўляную частку алтара, закапціў храм знутры. Дабраславеньне аднавіць касьцёл тады атрымаў ад папы Рымскага майстар Казімір Місюра. І алтар, і храм былі рэстаўраваныя.
Замак Льва Сапегі (2004)
Замак Льва Сапегі ў Быхаве загарэўся ў 2004 годзе. Згарэлі дах і гарышча. У 2010 годзе замак пачалі рэканструяваць і яшчэ ня скончылі.
Нясьвіскі замак (2002 год)
Рэзыдэнцыя Радзівілаў — Нясьвіскі замак загарэўся ў Калядную ноч у 2002 годзе. Пажар ахапіў 500 квадратных мэтраў, часткова пашкодзіў дах і сьцены. Пажар тушылі 127 чалавек на марозе —25 градусаў. Цяпер Нясьвіскі замак адноўлены, у год туды прыяжджаюць да паўмільёна турыстаў.
Спаса-Праабражэнская царква ў Заслаўі (1996)
У кастрычніку 1996 году сатаністы падпалілі Спаса-Праабражэнскую царкву ў Заслаўі. У выніку пажару цалкам выгарэла званіца, дах, частка хору, пацярпелі іканастас, разьбіліся званы, абсыпалася тынкоўка, зьнішчаны вітражы вокнаў.
Цалкам аднавіць царкву ўдалося толькі ў 2000 годзе.
Мірскі замак (1980-я)
У 1980-х здарыўся пажар у Мірскім замку. У палацы гарэлі драўляная падлога, бэлькі і дах. Цяпер Мірскі замак адрэстаўраваны, ён прызнаны адной з галоўных гістарычных каштоўнасьцяў сучаснай Беларусі.
Не ўдалося ўратаваць
Драўляная царква XVIII стагодзьдзя ў Лелікаве (2019 год)
У 2019 годзе ў вёсцы Лелікава Кобрынскага раёну згарэла царква XVIII стагодзьдзя, якая ўваходзіла ў сьпіс гісторыка-культурных каштоўнасьцяў. Уратаваць помнік гісторыі не ўдалося.
Будынак былога пажарнага дэпо ў Магілёве (2018)
Будынак былога пажарнага дэпо ў Магілёве 1908 году пабудовы згарэў у 2018 годзе. Выгаралі ўсе драўляныя канструкцыі, засталіся толькі сьцены. Суседні будынак гарэў у 2014 годзе. Цяпер абодва плянуюць рэканструяваць.
Царква Сьвятога Духа ў Рэчках (2017)
У сьнежні 2017 году ў вёсцы Рэчкі ў Вілейскім раёне згарэла царква Сьвятога Духа, помнік архітэктуры XIX стагодзьдзя. Царква была драўляная, але пазьней яе абклалі цэглай. Згарэла цалкам.
Касьцёл Сьвятога Яўхіма ў Клюшчанах (2017)
У ноч на 6 чэрвеня 2017 году ў вёсцы Клюшчаны Астравецкага раёну згарэў парафіяльны касьцёл Сьвятога Яўхіма. Касьцёл у Клюшчанах быў збудаваны ў 1726 годзе і дзейнічаў да 1948 году, пакуль яго не закрылі савецкія ўлады. У 1990 годзе касьцёл аднавілі і адбудавалі, у 1993-м асьвяцілі паўторна. Да пажару яго зьбіраліся ўключыць у сьпіс гісторыка-культурных каштоўнасьцяў.
Храм Георгія Пераможцы ў Мазыры (2006)
Як мінімум двойчы ў Мазыры ў 2006 годзе гарэў праваслаўны храм Георгія Пераможцы. Яго падпаліла група сатаністаў, якіх пасьля за гэта судзілі. У выніку аднаго з падпалаў драўляная царква згарэла цалкам. На гэтым месцы збудавалі новы храм.
