Апоўдні 10 сакавіка ратавальнікі Кобрынскага раёну атрымалі сыгнал аб пажары ў царкве ў вёсцы Лелікава, паведамляе Міністэрства надзвычайных сытуацыяў. Агонь пагасілі, пацярпелых няма, але будынак моцна пашкоджаны, дах згарэў.
Настаяцель расказаў, што сам прыбыў на месца пасьля званка тутэйшых людзей, але ня змог увайсьці ў царкву, бо валіў густы дым і было горача. Прычына пажару высьвятляецца.
Драўляны будынак плошчай 5x19 м і вышынёй 6 м занесены ў сьпіс гістарычна-культурных каштоўнасьцяў. Праваслаўны храм у гонар сьвятога Дзьмітра Салунскага збудаваны ў XVIII стагодзьдзі, а паводле некаторых крыніцаў — у XVIІ. Ці магчыма яго аднавіць, невядома.
