Зьніклага 10 красавіка ў Камянецкім раёне двухгадовага Ваню Валошына знайшлі сёньня мёртвым. Гэтую інфармацыю Радыё Свабода пацвердзіў кіраўнік пошукавага атраду «Анёл» Сяргей Коўган.
Хлопчыка выявілі ў мэліярацыйным канале. Яго цела знайшоў валянтэр атраду «Анёл», які ўпершыню ўдзельнічаў у пошуках.
Ваня Валошын, якому 1 год 11 месяцаў, выйшаў з дому ў вёсцы Люба́шкі ў Камянецкім раёне на Берасьцейшчыне ўдзень 10 красавіка. Маці Вані зьвярнулася ў міліцыю ў 21:00. Яна расказала, што сын выйшаў з дому каля 15:00 і не вярнуўся дахаты. З таго часу ягонае месцазнаходжаньне было невядомае.
На пошукі дзіцяці адразу рушылі міліцыянты, ратаўнікі, памежнікі, вайскоўцы. Сёньня ў пошуках хлопчыка ўдзельнічалі 93 валянтэры.
Як шукалі і знайшлі Ваню Валошына. Фотагалерэя
Чатыры дні каля вёскі Любашкі ў Берасьцейскай вобласьці шукалі двухгадовага Ваню Валошына. Хлопчык са шматдзетнай сям'і зьнік з падворку а 15.00 у сераду, 10 красавіка. Пошукавы атрад "Анёл" арганізаваў у вёсцы штаб і сабраў для пошукаў сотню валянтэраў з розных гарадоў.
