Сёньня ў Польшчы ўзгадваюць ахвяраў авіякатастрофы прэзыдэнцкага лайнэра 10 красавіка 2010 года. У выніку гэтага здарэньня загінулі прэзыдэнт Лех Качыньскі, ягоная жонка Марыя і яшчэ 94 пасажыры самалёту ТУ-154.
Як паведамляе Польскае радыё, сёньня было абвешчана, што канчатковы даклад камісіі па паўторным расьсьледаваньні прычынаў авіякатастрофы будзе апублікаваны напрыканцы бягучага і пачатку будучага году. Пра гэта заявіў кіраўнік падкамісіі і былы міністар нацыянальнай абароны Польшчы Антоні Мацярэвіч.
Прэзэнтацыя канчатковых высноваў адбудзецца пасьля завяршэньня працы амэрыканскай дасьледчай групы. Але прычыны аварыі самалёту, паводле Антонія Мацярэвіча, ужо пацьверджаныя.
«Адбыўся выбух у крыле, а пазьней у цэнтрапляне — гэта стала прычынай сьмерці», — сказаў ён.
Мацярэвіч адзначыў, што па гэтай справе няма сумневаў, паколькі наяўнасьць выбуховых рэчываў была тройчы пацьверджана ў тых месцах, дзе камісія сьцьвердзіла найбольшыя пашкоджаньні і дэфармацыі.
«Гэта ў 2012 і 2013 гадах пацьвердзілі вынікі вадкаснай храматаграфіі, а цяпер — вынікі дасьледаваньня, праведзенага брытанскай лябараторыяй», — падкрэсьліў кіраўнік падкамісіі па паўторным расьсьледаваньні прычынаў смаленскай авіякатастрофы.
Учора Антоні Мацярэвіч паведаміў, што камісія зьвярнулася ў пракуратуру наконт магчымасьці ўчыненьня злачынства з боку былога старшыні і сябраў Камісіі па дасьледаваньні авіякатастрофаў.
Папярэдняя камісія, якая вывучала катастрофу, зрабіла выснову, што прычынай катастрофы стала недапушчальнае зьніжэньне самалёту падчас спробы прызямленьня і сутыкненьне з дрэвамі. Паводле гэтай папярэдняй камісіі, рэгістратары палёту, якія знаходзіліся на борце самалёта, не пацьвярджаюць вэрсіі аб выбуху ў машыне.
Новая падкамісія была сфармаваная пасьля таго, як да ўлады ў краіне прыйшла партыя Права і справядлівасьць, кіраваная Яраславам Качыньскім, братам загінулага прэзыдэнта.
