У Вільні затрыманы былы амбасадар Літвы ў Расеі, генэральны дырэктар Літоўскай асацыяцыі палат гандлю, прамысловасьці і рамёстваў Рымантас Шыдлаўскас.
Як паведамляе партал Delfi са спасылкай на сьледчыя органы, Шыдлаўскаса і яшчэ двух чалавек абвінавачваюць у атрыманьні хабару ад грамадзяніна Расеі. У абмен на хабар былы дыплямат нібыта паабяцаў абяцаў спрыяць атрыманьню расейцам шэнгенскай візы. Паводле дадзеных агенцтва BNS, грамадзянін Расеі, якога вінавацяць у даваньні хабару, таксама затрыманы, і гэта Рынат Насыраў, саўладальнік расейскага банку «Новый промышленный банк». Летась Цэнтральны банк Расеі адклікаў у гэтага банку ліцэнзію.
Шыдлаўскас доўгія гады ўзначальваў Консульскі дэпартамэнт Міністэрства замежных спраў Літвы. Амбасадарам у Расеі ён быў з 2002 па 2008 год.
