Міністэрства замежных спраў Беларусі занепакоілася рэабілітацыяй у Польшчы Рамуальда Райса («Бурага»). Раней сьцьвярджалася, што ён удзельнічаў у генацыдзе этнічна беларускага насельніцтва на Падляшшы.
Пра гэта заявіў прэс-сакратар МЗС Анатоль Глаз.
Што сказалі ў МЗС?
- «Злачынца, які асабіста аддаваў загады ўдзельнічаць у забойстве мірных жыхароў беларускіх вёсак на Падляшшы, ня можа быць абелены».
- «Асаблівую занепакоенасьць» выклікалі заявы дасьледчыкаў, што «Буры» меў магчымасьць «спаліць ня 5, а значна больш беларускіх вёсак».
У выніку крывавага рэйду аддзелу «Бурага» ў студзені-лютым 1946 году згарэлі, часткова або цалкам, вёскі Залешаны, Волька, Шпакі, Зані, Канцавізна. Загінулі тады ад куль або ў полымі 79 чалавек, у тым ліку жанчыны і дзеці ды 30 беларускіх фурманаў, якіх «Буры» перахапіў на шляху свайго крывавага рэйду.
