Удзельнікі суполкі «Матчын рух 328» у сацыяльнай сетцы «ВКонтакте» паведамляюць пра блякаваньне з боку мадэратараў сайту.
Суполка была створана для падтрымкі і інфармаваньня сваякоў асуджаных па так званым «наркатычным артыкуле».
«Мы зьведалі нападкі і атакі з боку тых, хто ня хоча, каб мы існавалі ўвогуле, — напісала ў паведамленьні адна з актывістак руху Ларыса Жыгар. — Цяпер чакаем тлумачэньняў ад мадэратараў сайту „ВКонтакте“. Сьпяшаюся засмуціць усіх, хто супраць нас: грамадзянская ініцыятыва „Матчын рух 328“ працягне працу. Калі нас так ненавідзяць, значыць, мы ідзём правільнай дарогай. Але тое, што адбываецца, — гэта ўжо сваволя...»
Пакараньне за наркатычныя злачынствы ў Беларусі. Што важна ведаць
- У красавіку-траўні 2018 года актывісткі «Маці 328» правялі 15-дзённую галадоўку ў Калінкавічах на Гомельшчыне і ў Пухавіцкім раёне на Меншчыне, а таксама 10-дзённую галадоўку ў Лідзе.
- Удзельнікі галадоўкі патрабавалі перагляду жорсткіх прысудаў, якія выносіліся ад 2013 году паводле 328 артыкула (ад 5 да 25 гадоў пазбаўленьня волі), а таксама зьменаў у заканадаўства.
- «Маці 328» лічаць, што ў некаторых выпадках тэрміны зьняволеньня несувымерныя злачынству, а закон недастаткова ўлічвае асобы злачынцаў, іх узрост ды іншыя акалічнасьці.
- 13 чэрвеня 2019 года Палата Прадстаўнікоў у другім чытаньні прыняла папраўкі ў артыкул 328. Мінімальны тэрмін пазбаўленьня волі за незаконнае абарачэньне наркотыкаў зьменшылі на 2 гады. У ліпені Лукашэнка падпісаў закон аб зьмене КК.
