Прэзыдэнт ЗША Дональд Трамп выступіў са штогадовым пасланьнем «Аб становішчы спраў у краіне» на сумесным пасяджэньні Сэнату і Палаты прадстаўнікоў Кангрэсу ЗША ў Вашынгтоне.
Гэта другі зварот Трампа на пасадзе кіраўніка дзяржавы, паведамляе «Голас Амэрыкі».
Пра эканамічныя дасягненьні
Першую частку прамовы прэзыдэнт прысьвяціў эканамічным посьпехам, дасягнутым за два гады ягонага прэзыдэнцтва. Ён згадаў эканамічны рост, у два разе большы, чым у апошнім дзесяцігодзьдзі, самае нізкае за 50 гадоў беспрацоўе, рэкордны ўзровень стварэньня новых працоўных месцаў.
Ён дадаў, што ў Кангрэсу засталося дзесяць дзён на прыняцьце законапраекту аб фінансаваньні ўраду.
Прэзыдэнт Трамп заклікаў рэспубліканцаў і дэмакратаў аб’яднацца для таго, каб перабудаваць і абнавіць транспартную інфраструктуру, актывізаваць даследаваньні для барацьбы з эпідэміяй ВІЧ, для лячэньня раку, асабліва сярод дзяцей. Акрамя таго, прэзыдэнт ЗША заклікаў Кангрэс пакончыць з сытуацыяй, калі цэны на лекі ў ЗША — адны з самых высокіх у сьвеце.
«Наступны галоўны прыярытэт для мяне і ўсіх нас — панізіць кошт мэдыцынскага абслугоўваньня і лекаў. Дзякуючы намаганьням маёй адміністрацыі у 2018 годзе цэны на лекі панізіліся найбольш за 46 гадоў», — заявіў прэзідэнт Трамп.
Кіраўнік ЗША падкрэсьліў, што амэрыканцы ўстрывожаныя заклікамі да сацыялізму ў ЗША. Паводле яго, гэтага ніколі не адбудзецца.
«Амэрыка была заснаваная на прынцыпах незалежнасьці і свабоды. Мы народжаныя свабоднымі, і мы застанемся свабоднымі», — заявіў Трамп.
Пра сьцяну на мяжы з Мэксікай
Прэзыдэнт ЗША нагадаў, што ён настойвае на ўнясеньні ў фэдэральны бюджэт радка аб выдзяленьні грошай на ўзьвядзеньне бар’еру на мяжы ЗША з Мэксікай. Паводле Трампа, законапраект аб бюджэце «дазволіць абараніць нашу радзіму і абараніць нашу паўднёвую мяжу».
Кіраўнік дзяржавы нагадаў прысутным пра новы буйны караван імігрантаў, які рухаецца зараз з поўдня на поўнач Мэксікі. Трамп сказаў, што ён зноў накіраваў вайскоцаў да паўднёвай мяжы.
Паводле яго, нелегальная іміграцыя ўяўляе сабой пагрозу для «бясьпекі і дабрабыту Амэрыкі». Прэзыдэнт ЗША заклікаў да правядзеньня іміграцыйнай рэформы. Ён падкрэсьліў, што за адсутнасьць бясьпекі на мяжы расплачваюцца шараговыя амэрыканцы.
Прэзыдэнт паведаміў, што ягоная адміністрацыя накіравала ў Кангрэс плян, які дазволіць пакончыць з памежным крызісам. Гэты план прадугледжвае ўзвядзенне на мяжы «разумнага, стратэгічнага, празрыстага сталёвага бар’еру, а ня проста бэтоннай сцяны», падкрэсьліў Трамп, дадаўшы, што «сьцены працуюць, ратуючы жыцьці людзей».
Выступ прэзыдэнта Дональда Трампа ў Кангрэсе ЗША
Пра разрыў ракетнай дамовы з Расеяй
Гаворачы пра дэнансацыю Дамовы аб зьнішчэньні ракет меншай і сярэдняй далёкасьці (РСМД), прэзыдэнт Трамп ўсклаў віну на Расею:
«Дзясяткі гадоў таму ЗША заключылі дамову з Расеяй, у яком мы пагадзіліся абмежаваць і паменьшыць нашыя ракетныя ўзбраеньні. У той час, калі мы прытрымліваліся кожнай літары Дамовы, Расея раз за разам парушала яе. Вось чаму я абвясьціў, што ЗША афіцыйна выходзяць з Дамовы аб ліквідацыі ракет сярэдняй і малой далёкасьці», — адзначыў Трамп.
Дамова аб зьнішчэньні РСМД была падпісаная ў 1987 годзе прэзыдэнтамі ЗША і СССР стала першай угодай у кантролі за ўзбраеньнямі, якая забараніла цэлы кляс узбраеньняў: крылатыя ракеты наземнага базаваньня з радыусам дзеяньня ад 500 да 5000 кілямэтраў.
Расея абвяргае абвінавачваньні ў тым, што яна парушае пагадненьне. Прыкладам парушэння дамовы з боку Расеі ЗША называюць новыя расейскія ракеты 9М729. ЗША ня мае ў Эўропе аналягаў гэтай зброі, здольнай дасягнуць эўрапейскіх сталіц і вайсковых базаў ЗША ў рэгіёне за кароткі прамежак часу.
Трамп пакінуў адкрытай магчымасьць заключэньня новай дамовы з удзелам Кітаю. Калі ж гэтага не адбудзецца, то ЗША перасягнуць ўсіх сапернікаў ў выдатках на новыя ўзбраеньні і ў інавацыях, папярэдзіў прэзыдэнт Трамп.
Дональд Трамп таксама заявіў, што ягоныя перамовы зь лідэрам Паўночнай Карэі дапамаглі пазьбегнуць вайны, і паведаміў, што новая сустрэча з Кім Чэн Ынам пройдзе 27-28 лютага ў Віетнаме.
Першапачаткова выступленьне прэзыдэнта перад Кангрэсам плянавалася на 29 студзеня. Аднак яно было перанесенае з прычыны так званага «шатдаўну» — частковага прыпыненьня працы ўраду.
Прэзыдэнт ЗША выступае са штогадовым пасланьнем да Кангрэсу згодна з Канстытуцыяй краіны. Зь першым такім пасланьнем у 1790 году выступіў першы прэзыдэнт Злучаных Штатаў Джордж Вашынгтон.
