У афрыканскім Каба-Вэрдэ адбылося пасяджэньне суду аб абраньні меры стрыманьня расейскім маракам, затрыманым паводле падазрэньня ў кантрабандзе наркотыкаў. Паводле РІА Новости, пра гэта 3 лютага паведамілі ў расейскім пасольстве ў краіне.
У дыпмісіі дадалі, што на час сьледзтва расейцы будуць знаходзіцца ў турме ў межах гораду Прая.
Таксама ў амбасадзе паведамілі, што афіцыйных абвінавачваньняў членам экіпажу ў ходзе пасяджэньня не было выстаўлена: абвінавачваньні прадставяць пасьля неабходных сьледчых мерапрыемстваў.
11 расейскіх маракоў былі затрыманыя ў Каба-Вэрдэ 1 лютага. Паведамлялася, што на судне ESER паліцыянты знайшлі 9,5 тон какаіну. Карабель пад панамскім сьцягам ішоў з Панамы ў Марока і спыніўся ў порце пасьля сьмерці аднаго з чальцоў экіпажу.
