У інтэрнэце працягваецца збор подпісаў пад пэтыцыяй да Міністэрства аховы здароўя з патрабаваньнем забясьпечыць бесьперабойныя пастаўкі ў аптэкі краіны прэпарата для астматыкаў — «Монтэлукаст».
Адна з аўтарак пэтыцыі распавяла, што яе сын — астматык зь пяці гадоў, цягам апошняга году ў яго было 5 прыступаў. Паводле ацэнкі лекара, каб замацаваць рэмісію, «Монтэлукаст» (5 мг) трэба будзе бесьперапынна прымаць увесь бліжэйшы год.
«У апошнія месяцы назіраліся перабоі з пастаўкамі, аднак доўгачаканую пушачку нам удавалася атрымаць своечасова. Сёньня ў раённай аптэцы мы не змаглі атрымаць неабходны прэпарат. Ва ўсім Пухавіцкім раёне няма прэпарата неабходнай дазоўкі, дый у цэлым — адны рэшткі», — гаворыцца ў пэтыцыі. Маці кажа, што «неабходнай дазоўкі няма ва ўсім горадзе Менску».
«Монтэмэд» (5 мг) паступіць у аптэкі на наступным тыдні
У прэс-службе Міністэрства аховы здароўя Беларусі карэспандэнту Свабоды патлумачылі, што тут непаразуменьне, бо «Монтэлукаст» — гэта міжнароднае непатэнтаванае найменьне.
«Яму адпавядаюць гандлёвыя назвы, зарэгістраваныя ў Рэспубліцы Беларусь — «Сынглён», «Сынгуляр» і «Монтэмэд». На дадзены момант «Сынглён» і «Сынгуляр» прысутнічаюць у аптэках у дазоўцы 4 мг і 10 мг. «Монтэмэд» у дазоўцы 10 мг ёсьць у аптэчнай сетцы краіны, а ў дазоўцы 5 мг прэпарат паступіць у аптэчную сетку на наступным тыдні».
Даведачны партал аптэк www.tabletka.by падае, што на вечар 6 лістапада беларускі прэпарат «Монтэмэд» (10 мг) адсутнічае ва ўсіх аптэках Менску.
У прэс-службе міністэрства патлумачылі, што гэтыя лекі паступілі на склады і ў аптэкі, аднак, відаць, інфармацыю не пасьпелі выставіць на сайт.
Імпартныя «Сынглён» і «Сынгуляр» у аптэках былі, але ў невялікай колькасьці.
Чаму няма папулярных парашкоў ад прастуды?
Раней Міністэрства аховы здароўя патлумачыла сытуацыю з адсутнасьцю некаторых папулярных лекаў супраць прастуды — «Фэрвэкс», «Тэрафлю экстра» ды іншых. Гэтую сытуацыю там зьвязалі з «завяршэньнем рэгістрацыі».
«Паколькі працэдура дзяржаўнай рэгістрацыі мае добраахвотны заяўны характар, Міністэрства аховы здароўя ня можа абавязаць вытворцаў рэгістраваць у Рэспубліцы Беларусь якія-небудзь пэўныя лекавыя сродкі ў пэўны тэрмін», — гаворыцца на сайце міністэрства.
Паводле інфармацыі кампаніі GlaxoSmithKline Consumer Healthcare, лекавы сродак «Тэрафлю» (парашок для раствору для прыёму ўнутр) не адгружаецца ў Беларусь з прычыны «ўнясеньня зьмяненьняў у нарматыўна-тэхнічную дакумэнтацыю».
Паводле Мінздароўя, інфармацыяй пра тэрміны аднаўленьня паставак гэтага прэпарата кампанія не валодае. Аднак міністэрства тлумачыць, што ў аптэках ёсьць іншыя айчынныя і імпартныя лекі ад прастуды і грыпу, таму, маўляў, «незаменных няма».
