У Берасьці асудзілі пратэстоўцаў супраць заводу, адзін заявіў пра пагаршэньне здароўя

22 кастрычнік 2018, 16:55 абноўлена 22 кастрычнік 2018, 16:59

ПД

Мітынг супраць будаўніцтва акумулятарнага заводу пад Берасьцем, 14 кастрычніка.

У Ленінскім судзе Берасьця адбыліся паседжаньні па справах чатырох затрыманых на мінулым тыдні пратэстоўцаў супраць акумулятарнага заводу.

Андрэй Шарэнда атрымаў 15 базавых штрафу (367,5 рублёў) за ўдзел у несанкцыянаванай масавай акцыі. Па 10 базавых (245 рублёў) атрымалі Валер Фамінскі і Алесь Абляк.

Абляк на працэсе заявіў хадайніцтва, каб яго судзілі на беларускай мове. Судзьдзя Аляксандар Семянчук адхіліў хадайніцтва, спаслаўшыся на тое, што ў Беларусі дзьве дзяржаўныя мовы.

Суд над адным зь лідэраў пратэстоўцаў Дзям’янам Лепясевічам перанесьлі па яго хадайніцтве на 26 кастрычніка. Лепясевіч сказаў, што блага пачуваецца пасьля затрыманьня, стаў горш бачыць і чуць. Ён заявіў, што расцэньвае як катаваньні тое, што ў камэры ізалятара была антысанітарыя, бляклае сьвятло, да яго падсялілі бруднага бадзягу, адключалі ваду, гудзеў вэнтылятар.

Лепясевіча, Абляка, Фамінскага і Шарэнду затрымалі напрыканцы мінулага тыдня за ўдзел у акцыі пратэсту супраць акумулятарнага заводу, якая прайшла 14 кастрычніка.

Праваабаронцы мяркуюць, што гэта былі прэвэнтыўныя затрыманьні, каб не дапусьціць іх удзелу ў пратэсьце 21 кастрычніка.

Акцыя 21 кастрычніка прайшла фактычна бязь лідэраў пратэсту. Блогеры Сяргей Пятрухін і Аляксандар Кабанаў адбывалі арышт, многіх пратэстоўцаў, а таксама журналістаў выклікалі позвамі ў міліцыю якраз на час правядзеньня акцыі ў нядзелю.

Пратэсты супраць акумулятарнага заводу ў Берасьці. Што важна ведаць

Месцазнаходжаньне новага акумулятарнага заводу пад Берасьцем

Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньн і працэдураў будаўніцтва.

Штонядзелі пратэстоўцы выходзілі на цэнтральную плошчу ў Берасьці. Блогераў і актывістаў затрымлівалі, выносілі ім папярэджаньні, штрафавалі і абавязвалі выбачыцца за відэа пра акумулятарны завод.

Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
У верасьні 2018 году на будоўлі заводу выявілі парушэньні пажарнай бясьпекі.
У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.