Пісьменьнік Кірыл Стаселька пачаў збор сродкаў на новую кнігу «Дзевяць жыцьцяў Віта Морэ». Каб яе выдаць, на плятформе Talaka.org зьбіраюць 9000 рублёў.
Сваю кнігу аўтар называе не літаратурным тэкстам, а размовай аўтара з чытачом, дыялёгам чытача са сваім уласным сьветам.
«Захапляльны, непрадказальны, экспэрымэнтальны твор, які гарманічна сумяшчае розныя літаратурныя жанры і філязофскія канцэпцыі ў адно цэлае», – гаворыцца ў апісаньні кампаніі.
Мінімальная сума для ахвяраваньня – 2 рублі, аўтар аддзячыць фундатару ў кнізе. Унёсшы ад 5000 рублёў, фундатар зможа абраць імя для аднаго з пэрсанажаў кнігі.
Папярэднія кнігі Кірыла Стаселькі «Дзіцячы маніфэст» і «Marginalis» у 2016–2017 гадах уваходзілі ў лонг-лісты прэміі Гедройця.
