Пра магчымасьць скарачэньня з двух тыдняў да 5–7 дзён пэрыяду адключэньня жылых дамоў ад гарачага водазабесьпячэньня заявіў прадстаўнік Міністэрства жыльлёва-камунальнай гаспадаркі Генадзь Аксьціловіч.
Ён паведаміў, што гэтае пытаньне знаходзіцца зараз у «стадыі вывучэньня».
«Мы маем досьвед, калі некаторыя працы праводзяцца не два тыдні, а цягам 5-7 дзён. Нельга сказаць, што такіх выпадкаў шмат, але яны існуюць, і пераважна там, дзе пракладзеныя новыя сеткі. Там, дзе трубаправод стары, — тэрмін працаў больш працяглы».
Паводле прадстаўніка міністэрства ЖКГ, ацэнка сытуацыі падказвае, што скарачаць тэрміны можна праз укараненьне новых тэхналёгій, на чым і засяроджваюцца камунальнікі.
На пытаньне, чаму такой праблемы не існуе ў іншых краінах Эўропы, Аксьціловіч адказаў, што ў пераважнай большасьці краін Эўропы наогул не існуе сыстэмы цэнтралізаванага ацяпленьня. Паводле Аксьціловіча, цяперашні тэрмін у два тыдні абгрунтаваны для ўсяго комплексу рамонтных працаў.
Камунальнікі сёлета плянуюць замяніць у Беларусі 600 км водаправодных труб, палова гэтай працы ўжо зробленая, паведаміў Аксьціловіч.
