Суд Фрунзэнскага раёну пакараў Паўла Севярынца, аднаго зь лідэраў пратэстаў супраць рэстарацыі «Поедем поедим» ля Курапатаў, 10 суткамі арышту
Сам Павал Севярынец на паседжаньне суду не прыйшоў. Суд палічыў знаходжаньне Севярынца ля рэстарацыі са сьцягам несанкцыянаваным пікетам і пакараў яго 10 суткамі арышту.
Павал Севярынец заявіў Свабодзе, што лічыць гэты прысуд беззаконьнем, што ўлады такім чынам хочуць зьбіць хвалю пратэсту супраць рэстарацыі ля Курапатаў.
Палітык чакае свайго затрыманьня неўзабаве і накіраваньня ў ізалятар.
«Варта будзе працягвацца, нягледзячы на арышт лідэраў, тут праблемы няма. Каб варта спынілася, трэба арыштаваць некалькі соцень чалавек, якія ў ёй бяруць удзел па чарзе. На пачатку ліпеня ўжо былі арыштаваныя шэсьць найбольш актыўных удзельнікаў, але гэта не спыніла нашую варту»,— заявіў палітык Свабодзе.
Раней Севярынец атрымаў штраф памерам 50 базавых велічыняў за ўдзел у прэсавай канфэрэнцыі каля брамы рэстарацыі «Поедем поедим», якую суд назваў пікетаваньнем. Суд тады прызнаў яго вінаватым паводле ч. 3 арт. 23.34 КаАП «Парушэньне парадку арганізацыі ці правядзеньня масавага мерапрыемства».
Павал Севярынец — адзін з ініцыятараў так званай «курапацкай варты». Ён амаль штодня дзяжурыць каля рэстарацыі. У пачатку ліпеня Севярынец быў сярод васьмі затрыманых актывістаў. За пікет у Курапатах ён правёў 10 сутак за кратамі.
Раней у суботу каля рэстарацыі «Подем поедим» затрымалі актывіста Максіма Вінярскага. Ён ужо адбывае 10 сутак у ізалятары часовага ўтрыманьня на вуліцы Акрэсьціна ў Менску.
Агулам суды завялі ўжо больш за 140 адміністрацыйных спраў на грамадзян, якія пратэставалі супраць адкрыцьця рэстарацыі «Поедем поедим».
7 адказаў на наіўныя пытаньні пра рэстаран ля Курапатаў і пратэсты супраць яго
Што важна ведаць аб пратэстах супраць новай рэстарацыі ў Курапатах:
- Рэстаран стаіць за 50 мэтраў ад месца, дзе ў 1930-я адбываліся масавыя расстрэлы. Карнікі НКВД расстралялі тут, па розных ацэнках, ад 30 тысяч да 250 тысяч чалавек.
- 28 траўня карэспандэнт Свабоды трапіў на тэрыторыю комплексу, дзе пабачыў падрыхтоўку да хуткага адкрыцьця рэстарацыі.
- Грамадзкія актывісты штодня ад 31 траўня пікетуюць забаўляльны комплекс, патрабуючы яго закрыцьця.
- 1 чэрвеня рэстаран «Поедем поедим» пачаў рэклямавацца ў інтэрнэце.
- Рэстаран «Поедем поедим» у Курапатах меркавана запрацаваў увечары 5 чэрвеня.
- 27 чэрвеня наведніцы рэстарацыі на аўтамабілі зьбілі актывіста Леаніда Кулакова, у яго пералом рукі.
- Старшыня Партыі БНФ Рыгор Кастусёў 13 ліпеня паведаміў пра нейкія дамоўленасьці з уладальнікам рэстарацыі, але якія гэта дамоўленасьці — пакуль не сказаў.
- Будоўля забаўляльнага комплексу пад назвай «Бульбаш-хол» пачалася ў 2012 годзе ў ахоўнай зоне Курапатаў. У 2014-м ахоўную зону зьменшылі.
- Першая грамадзкая абарона Курапатаў адбывалася ў 2001–2002 гг., калі моладзь пратэставала супраць пашырэньня кальцавой дарогі праз урочышча. На пачатку 2017-га актывісты адстаялі Курапаты ад будоўлі бізнэс-цэнтру.
Сталінскія рэпрэсіі і Курапаты
У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што іх зазналі як мінімум 600 тысяч чалавек. Паводле іншых ацэнак, гэтая лічба дасягае 1,4 мільёна. Але дакладная колькасьць невядомая — КДБ дагэтуль не раскрыў архівы.
Паводле розных падлікаў, ад 30 да 250 тысяч чалавек карнікі НКВД расстралялі з 1937 па 1941 гады ў Курапатах — лясным масіве пад Менскам.
