Надвор’е ў жніўні спрыяе ўборцы ўраджаю, заявіла намесьніца кіраўніка Рэспубліканскага цэнтру па гідрамэтэаралёгіі Сьвятлана Кузьміч.
Сыноптыкі прагназуюць, што тэмпэратура ў жніўні ў Беларусі будзе на 1 градус цяплейшай, чым звычайна.
Навальніцы ў апошнім летнім месяцы будуць, але месцамі: такія ліўні, як былі ў ліпені, не паўторацца.
З прычыны дажджоў вільготнасьць збожжа замест звычайных 12-14% даходзіла да 30%.
У апошняй дэкадзе жніўня ў Беларусі прагназуецца так званае «тэмпэратурнае расслаеньне»: на паўднёвым захадзе застанецца сьпякота, а на паўночным усходзе тэмпэратура панізіцца да 11-18 градусаў удзень.
Сьпёка спрыяе пажарам
«Сёлета за 7 месяцаў у аграпрамысловым комплексе адбылося 67 пажараў», — паведаміў супрацоўнік Міністэрства надзвычайных сытуацый Дзьмітры Турчын. Аднак, хоць пажараў стала болей, матэрыяльныя страты пакуль невялікія і няма загінулых ад агню.
