Злучаныя Штаты разьлічваюць на значнае раззбраеньне Паўночнай Карэі на працягу наступных двух з паловай гадоў. Пра гэта заявіў дзяржсакратар ЗША Майк Пампэо, які знаходзіцца ў Сэуле для сустрэч з кіраўніцтвам Паўднёвай Карэі.
13 чэрвеня, на наступны дзень пасьля сустрэчы на найвышэйшым узроўні паміж прэзыдэнтам ЗША Дональдам Трампам і паўночнакарэйскім лідэрам Кім Чэн Ынам у Сынгапуры, Пампэо праінфармаваў саюзьнікаў пра вынікі перамоў.
Як паведамлялася раней, пасьля сустрэчы прэзыдэнта ЗША і кіраўніка КНДР яны дасягнулі дамоўленасьці «працаваць над поўнай дэнуклеарызацыяй Карэйскага паўвострава». Аднак дакумэнт падвергнуўся крытыцы праз адсутнасьць падрабязнасьцяў пра тое, калі і як Пхеньян адмовіцца ад сваёй ядзернай зброі.
Раней 13 чэрвеня Трамп напісаў у твітэры, што Паўночная Карэя больш не ўяўляе сабой ядзерную пагрозу сьвету.
Паўночная Карэя абвясьціла, што Трамп пагадзіўся на паступовы працэс дэнуклеарызацыі, пры гэтым кожны з бакоў будзе рабіць адначасовыя, узаемныя крокі для паслабленьня напружанасьці і ўсталяваньня міру паміж даўнімі ворагамі.
