Умовы пэнсійнай рэформы ў Беларусі празрыстыя, якіх-небудзь зьменаў не плянуецца.
Пра гэта заявіла прэс-сакратар Савету рэспублікі Вольга Казловіч, паведамляе БелТА.
Пытаньне аб пэнсійным забесьпячэньні разглядалася 7 чэрвеня на пасяджэньні сэкцыі навукова-кансультатыўнай рады па пытаньнях сацыяльна-эканамічнага разьвіцьця ў Савеце Рэспублікі.
Паводле Вольгі Казловіч, «адбылася актыўная дыскусія», гучалі розныя прапановы:
- павысіць пэнсійны ўзрост для жанчын;
- перагледзець аплату працы ў бюджэтнай сфэры;
- увесьці ўмоўна назапашвальную пэнсійную сыстэму;
- увесьці дадатковыя карпаратыўныя сыстэмы, і іншыя.
Паводле Вольга Казловіч, «нельга ацэньваць меркаваньні, якія прагучалі, як адпрацаваныя прапановы».
Сярэдняя пэнсія павінна складаць ня менш за 40% ад сярэдняга заробку
«Стаіць задача, каб сярэдняя пэнсія складала ня менш за 40% ад сярэдняй заработнай платы па краіне. Гэта залежыць ад збалянсаванасьці Фонду сацыяльнай абароны насельніцтва і магчымасьцей рэспубліканскага бюджэту», — сказала прэс-сакратар Савету Рэспублікі.
У пасяджэньні ўзялі ўдзел прадстаўнікі дзяржаўных органаў і экспэрты зь бізнэс-супольнасьці, грамадзкіх аб’яднаньняў.
Пэнсійны ўзрост жанчын можа павысіцца
Павышэньне пэнсійнага ўзросту для жанчын можа працягнуцца пасьля 2022 году.
Паводле БелаПАН, пра гэта было заяўлена ў Савеце Рэспублікі, дзе разглядалася пытаньне дэфіцыту Фонду сацыяльнай абароны насельніцтва.
Бюджэт Фонду сацыяльнай абароны насельніцтва, за кошт сродкаў якога выплачваюцца пэнсіі і дапамогі, выконваецца з дэфіцытам з 2013 году.
Тэма дэфіцыту выносілася на разгляд экспэртаў у Савеце Рэспублікі. Збалянсаваць фонд плянуецца за кошт «комплексу захадаў, у тым ліку шляхам пераносу некаторых выдаткаў фонду на рэспубліканскі бюджэт».
Сярод прапанаваных захадаў:
- выплачваць дапамогу па доглядзе за інвалідамі першай групы і састарэлымі, якія дасягнулі 80 гадоў, за кошт сродкаў рэспубліканскага бюджэту, а не са сродкаў фонду;
- зьмяніць падыходы да аплаты бальнічных (прапануецца не аплачваць бальнічныя работнікам у сувязі з агульным захворваньнем або побытавай траўмай першыя тры каляндарныя дні, а аплачваць іх толькі з чацьвёртага дня часовай непрацаздольнасьці);
- працягнуць павышэньне пэнсійнага ўзросту для жанчын з 2023 году.
Калі ўпершыню павысілі пэнсійны ўзрост
Першае павышэньне пэнсійнага ўзросту ў Беларусі было абвешчана ў 2016 годзе. Тады пастанавілі павышаць пэнсійны ўзрост для жанчын і мужчын з 2017 году штогод на шэсьць месяцаў.
У выніку за 2017–2022 гады пэнсійны ўзрост жанчын вырасьце з 55 да 58 гадоў, а мужчын — з 60 да 63 гадоў.
