Дадатковы новы купал — канфайнмэнт — над 4-м энэргаблёкам Чарнобыльскай АЭС плянуецца ўвесьці ў эксплюатацыю ў сьнежні бягучага году, паведаміў прэзыдэнт Украіны Пятро Парашэнка.
«Сёлета завершыцца адзін з важных этапаў ператварэньня аб’екта „Ўкрыцьцё“ ў экалягічна бясьпечную сыстэму», — сказаў пра новы купал Пятро Парашэнка.
Гэты канфайнмэнт над разбураным у аварыі энэргаблёкам пачалі будаваць у 2012 годзе, устанавілі ў 2016-м, «насунуўшы» яго над старым, збудаваным яшчэ ў 1986-м.
Парашэнка нагадаў, што на мінулым тыдні Вярхоўная Рада прыняла ў першым чытаньні закон аб унясеньні зьменаў у праграму зьняцьця ЧАЭС з эксплюатацыі.
Зьмены, казаў ён, дазволяць падоўжыць работы ў кансэрвацыі трох блёкаў; увесьці ў эксплюатацыю сховішча адпрацаванага ядзернага паліва і абʼекты для радыяактыўных адходаў.
